काठमाडाैं,बैशाख-२७ :  ३५ वर्षअघिको सुपरहिट फिल्म के घर के डेराको नामबाट फेरि फिल्म बन्ने भएको छ । लोकप्रिय निर्देशक दीपेन्द्र के खनालको निर्देशनमा निर्माण हुने फिल्मको हालै राजधानीमा आयोजित एक समारोहबीच शुभ मुहुर्त गरिएको छ ।  फिल्म निर्वाचन लगत्तै सुटिङ फ्लोरमा जाने निर्देशक खनालले जानकारी गराए । स्वयम्भूस्थित हारती माता मन्दिरमा शुभ मुहूर्त गरी एक दृश्य छायांकन गरिएको फिल्मको छायांकन स्थानीय तहको निर्वाचन सकिएपछि जेठ २ गतेबाट शुरु हुने उनले बताए ।  फिल्मको सुटिङ ३० दिनको सेड्युलमा काठमाडौं उपत्यकामा हुनेछ।

दयाहाङ  राई, वर्षा राउत, सुरक्षा पन्त, रवीन्द्र झा, लक्ष्मी गिरी, आशान्त शर्मा, प्रभाकर न्यौपानेलगायतले अभिनय गर्ने फिल्म ए प्लस इन्टरटेनमेन्टको ब्यानरमा शरद श्रेष्ठ, राजिव श्रेष्ठ र किरण महर्जनकले निर्माण गर्न लागेकी हुन् । युवराज कार्की कार्यकारी निर्माता रहेको फिल्ममा सिंगे लामाको कथा तथा महेश दवाडीको पटकथा र संवाद रहनेछ। फिल्मका मुख्य अभिनेता विपिन कार्कीले निर्देशक खनालसँगको दोस्रो सहकार्यले उत्साहित भएको बताए । निर्देशक खनालले काठमाडौंमा बस्ने सम्पूर्ण डेरावासीको जीवनसँग मिल्दोजुल्दो हुने फिल्मबाट दर्शकले सम्पूर्ण खुराक पाउने दाबी गरे ।