चितवनका मतदान स्थलहरुमा धमाधम मतपत्रहरु पठाउन लागिएको छ । मुख्य निर्वाचन अधिकृतको कार्यालय भरतपुका प्रवक्ता पुरुषोत्तम पौडेलले २८ गतेसम्म मतहरु सम्बन्धित मतदान केन्द्रहरुसम्म पुगिसक्ने बताउनुभएको छ । चितवनका लागि ४ लाख ३७ हजार ४ सय ५४ वटा मतपत्रहरु निर्वाचन आयोगले पठाएको छ । चितवनमा ३ लाख ९७ हजार ६ सय ८५ मतदाता छन् । मतदान अधिकृतहरुले सुरक्षाकर्मीको सहायतामा मतपत्रहरुलाई मतदान केन्द्रसम्म लगेर सुरक्षित भण्डारण गर्नेछन् ।
भरतपुरबाट टाढाका दुरीमा रहेका इच्छाकामना गाउँपालिका, माडी नगरपालिका नगरपालिकाभित्रका अधिकाँस मतदान अधिकृतहरुले मतपत्रहरु लगिसकेको बताउनुभयो । भरतपुर महानगरका लागि आज (मंगलबार) दिउसोदेखि मतपत्रहरु पठाइने बताउनुभयो । जिल्ला निर्वाचन कार्यालय चितवनले २५ गते सार्वजनिक सूचना जारी गर्दै मतदान सामाग्रीहरु लैजाने कार्यतालिका सार्वजनिक गरेको छ । इच्छाकामना, माडी, राप्तीका लागि २६ गते, भरतपुर, कालिका, रत्ननगर, खैरहनीका लागि २७ गते मतदान सामाग्री लैजाने व्यवस्था मिलाएको छ ।
जिल्ला निर्वाचन कार्यालय चितवनका प्रमुख भिमसेन कार्कीले सबै मतदान केन्द्रहरुमा २७ गतेसम्म आवश्यक सबै मतदान सामाग्रीहरु पठाइसकिने बताउनुभयो । मतदान केन्द्रमा रहेका मतदाताको संख्याको करिब १० प्रतिशत थपेर बनाएका मतपत्रको प्याकेजिङहरु मतदान अधिकृतहरुले सुरक्षाकर्मी साथमा लिएर मतदानस्थलम पु¥याउनेछन् ।
भौगोलिक दुरी टाडा रहेका मतदानस्थलका मतदान अधिकृतहरुले सोमबार र मंगलबार मतपत्रहरु लैजानेछन् । भरतपुर क्षेत्रका मतदान अधिकृतहरुले २८ गतेनै लैजान सक्नेछन् । मतदाताहरुको परिचयत्रवितरणको काम २८ र २९ गते हुनेछ । मतदानस्थलबाटै मतदाता परिचयपत्र वितरण हुने जनाइएको छ । मतदानस्थलमा मतदान गर्ने ठाउँको व्यवस्थापनको काम समेत धमाधम भैरहेका छन् । मतदानस्थलको सुरक्षाका लागि सुरक्षाकर्मी परिचालन भैसकेको छ ।
कहाँ कति मतदाता र मतदानस्थलहरु छन ?
स्थानीय तहको चुनावका लागि चितवनमा ३ लाख ९७ हजार ६ सय ८५ मतदाता छन् । २०७४ को स्थानीय तहको चुनावको तुलनामा यसपाली ८४ हजार ६ सय ८२ मतदाता थपिएका छन् । चितवनमा १ सय ६१ मतदान स्थलमा ४ सय ५१ मतदान केन्द्रहरु रहेका छन् । २०७४ को स्थानीय तहको चुनावको तुलनमा भरतपुरमा ३५ हजार ४ सय ७८ नयाँ मतदाता सहित १ लाख ८५ हजार ७ सय ५२ जना मतदाता छन् । महानगरमा २९ वटा वडामा ६५ मतदानस्थलमा २ सय २ मतदान केन्द्रहरु छन् ।
इच्छाकामनामा ३ हजार ९ सय ८० नयाँ मतदाता सहित १५ हजार ६ सय ३४ जना मतदाताहरु छन् । इच्छाकामनाका ७ वडामा १४ मतदानस्थलमा २२ मतदान केन्द्रहरु छन् । माडीमा ६ हजार ६ सय ४७ नयाँ मतदाता सहित २८ हजार ३ सय २० मतदाताहरु छन् । माडीका ९ वडामा १५ मतदान स्थल सहित ३२ मतदान केन्द्रहरु छन् ।
रत्ननगरमा ९ हजार ४ सय ८८ नयाँ मतदाता सहित ५२ हजार ६ सय ६२ मतदाता छन् । रत्ननगगरका १६ वडामा २१ मतदानस्थलमा ६० मतदान केन्द्रहरु छन् । खैरहनीमा १० हजार २ सय ६८ नयाँ मतदाता सहित ४३ हजार ५ सय ३१ मतदाता छन् । खैरहनीका १३ वडामा १७ मतदान स्थलमा ५१ मतदान केन्द्रहरु छन् । राप्तीमा १० हजार ६ सय ५१ नयाँ मतदाता सहित ४० हजार ६ सय ४९ जना मतदाता छन् । राप्तीका १३ वडामा १८ मतदानस्थल सहित ४७ मतदान केन्द्रहरु छन् । कालिकामा ८ हजार १ सय ७० नयाँ मतदाता सहित ३१ हजार १ सय ५७ मतदाताहरु छन् । कालिकाको ११ वडामा ११ मतदानस्थलमा ३७ मतदान केन्द्रहरु छन् ।
