भरतपुर । निर्वाचनको नतिजा कस्तो आउला भन्नेमा यतिबेला देशकै ध्यान भरतपुर महानगरपालिकामा परेको छ । भरतपुरलाई दलहरुले प्रतिष्ठाको विषय नै बनाएका छन् । २०७४ मा मतगणनाका क्रममा मतपत्र च्यातिएको विषय अझै पनि चर्चामा छ ।

निर्वाचन आयोगले यसपटक भने मतपत्रको सुरक्षामा विशेष प्राथमिकता दिएको छ । आयोगले मतगणना स्थलमा अनिवार्य सिसी क्यामराको व्यवस्था गर्न निर्देशन पनि दिइसकेको छ । यसपालि भरतपुर महानगरपालिकाको मतगणना चितवन उद्योग संघको औद्योगिक प्रदर्शनी केन्द्रमा हुनेछ ।

प्रदर्शनी केन्द्रको ‘सी’ ब्लकमा मतगणनाका लागि व्यवस्थापन गर्ने काम भइरहेको छ । दलका प्रतिनिधिले मतपत्र च्यात्न नपाऊन् भनेर मतगणना स्थलमा फलामको बार हालिँदैछ । दलका प्रतिनिधि बस्ने ठाउँ छुट्टयाएर फलामको बार लगाइएको हो ।

प्रतिनिधिले मतगणना गरेको हेर्न मिल्ने गरी फलामको बारमा जाली पनि हालिने मुख्य निर्वाचन अधिकृतको कार्यालय भरतपुरका सूचना अधिकारी पुरूषोत्तम पौडेलले जानकारी दिए । मतगणना स्थलमा आठवटा सिसी क्यामरा जडान गरिसकिएको उनले बताए ।

‘मतगणना स्थलमा विद्युत् र इन्टरनेटको व्यवस्था पनि गरिसकेका छौँ । मतगणना स्थल पूरै कभरेज हुने गरी आठवटा सिसी क्यामरा जडान गरेका छौँ । मतदान सकिएर बेलुका मतपेटिका ल्याइसकेपछि प्रदर्शनी केन्द्रमा कर्मचारी, दलका प्रतिनिधि र पत्रकारबाहेक कसैलाई पनि छिर्न दिदैनौँ’, उनले भने ।

मतगणना हुने ब्लकको उत्तरतर्फको प्यासेजमा मतपत्र ल्याएर राखिने उनले बताए । मतपत्र राखिएको प्यासेजको पछाडिपट्टि शौचालय छ । मतगणना गर्ने कर्मचारीले मात्रै उक्त शौचालय प्रयोग गर्ने उनले जानकारी दिए ।

‘मतगणना गर्ने कर्मचारीले मतपत्र राखिएको ठाउँभन्दा पछाडिको शौचालय प्रयोग गर्नुहुन्छ । कर्मचारी कता गए, के गरे भनेर दलका प्रतिनिधिले सिसी टिभी हेरेर थाहा पाउन सक्नुहुन्छ’, उनले भने । दलका प्रतिनिधिका लागि मतगणना स्थलबाहिर छुट्टै शौचालयको व्यवस्था गरिएको छ ।

मतगणना हुने ब्लकको पश्चिमतिरको छुट्टै एउटा कोठामा पत्रकारहरुलाई बस्ने ठाउँको व्यवस्था गरिएको छ । पत्रकारले मुख्य गेटबाट फोटो र भिडियो लिनसक्ने उनले बताए । भरतपुर महानगरपालिकामा एक लाख ८५ हजार ७५२ मतदाता छन् ।