भरतपुर महानगरमा जारी मतगणनामा रेनु दाहालले मतान्तर बढाउदै लैजानुभएको छ । दोस्रो कार्याकालका लागि मेयर उम्मेदवार बनेकी रेनु दाहालले आज (मंगलबार) राती ८ बजेसम्मको मतगणनामा ३ सय ५५ मतान्तरले अगाडी हुनुहुन्छ । रेनुले ७ हजार ४ सय २३ मत ल्याउनुभएको छ । सत्तागठबन्धनबाट उम्मेदवार बन्नुभएकी दाहाल सोमबारदेखि मतान्तर बढाउन लाग्नुभएको छ । एमालेबाट मेयर उम्मेदवार विजय सुवेदीले ७ हजार ६८ मत ल्याउनुभएको छ ।

स्वतन्त्र उम्मेदवार जगन्नाथ पौडेलले ३ हजार ५ सय ९४ मत ल्याउनुभएको छ । उपमेयरमा कांग्रेसका चित्रसेन अधिकारीले ८ हजार ९ सय ८९, राप्रपाकी हिमला गुरुङले ५ हजार ८ सय ४० मत ल्याउनुभएको छ । मेयरमा रेनु या विजय को आउँछ भनेर धेरैको चासो बढेको छ । २१ हजार ७ सय ५४ मतगणना सकिएको छ । २०७४ को चुनावमा ५ वडासम्म आइपुग्दा रेनु ५६ मतले देवी ज्ञवालीभन्दा पछाडी हुनुहुन्थ्यो । यसपाली रेनुको पक्षमा ३ सय ४३ मत बढेको छ । मतान्तर सुधार्न सफल भएको देखिन्छ । कांग्रेसका बागी उम्मेदवार पौडेलको पक्षमा मत बढेपनि रेनुको मत निराशाजनक नभएपछि सत्तागठबन्धनका नेताहरु उत्साहित छन् ।

पौडेलले ६ देखि ९ नम्बर वडासम्म केही बढी मत ल्याउने आँकलन गरिएपनि विजय सुवेदीले यी वडामा फराकिलो मतान्तर बनाउन नसक्ने विश्लेषण भएका छन् । २०७४ को चुनावमा ६, ८ नम्बर वडा कांग्रेसले जितेको थियो भने ७, ९ नम्बर वडामा एमालेले जितेको थियो । ७ र ९ मा एमालेबाट निर्वाचित वडाध्यक्षहरु यसपाली एकिकृत समाजवादीमा छन् । दुवै उम्मेदवार दोस्रो कार्याकालका लागि वडाध्यक्ष बन्ने दौडमा छन् । एमालेको मत कटौती हुने अपेक्षामा माओवादी केन्द्र छ । मेयरमा स्वतन्त्र उम्मेदवार बनेका पौडेल कांग्रेसको जिल्ला अधिवेशनमा महाधिवेशस प्रतिनिधिमै हारेको गृह वडा समेत हो । त्यसैले माओवादी मत धेरै पाउने आशमा छ ।

वडा नम्बर १० र १२ मा एमालेबाट निर्वाचित वडाध्यक्ष एकिकृत समाजवादीमा लागेका छन् । ११ मा विगतमा एमालेबाट निर्वाचित वडाध्यक्षमात्रै एमालेमा छन् । ११ नम्बर वडामा भने सत्तागठबन्धनलाई चूनौती देखिन्छ । २०७४ मा ११ नम्र वडामा १ हजार १ सय ६२ मतान्तर थियो ।  १४ देखि २१, २४, २७ नम्बर वडामा कांग्रेस बलियो छ ।नारायणगढ, भरतपुर क्षेत्रमा रेनु–विजयबीच निकै प्रतिस्पर्धा देखिएपनि पश्चिम चितवनतर्फ लाग्दा मतान्तर बढ्ने अनुमान गर्न थालिएको छ ।

१३, २५ र २६ माओवादीलेनै जितेको थियो । २२, २८ र २९ नम्बर वडामा एमालेले जितेको थियो । तर, २२ बाट निर्वाचित वडाध्यक्ष एकिकृत समाजवादीमै छन् । रेनु पश्चिमका वडाहरुको मतगणनामा अगाडी आउनेमा गठबन्धनका जिल्ला नेताहरु विश्वस्त छन् । तर,  बलियो संगठन, विकासको स्पष्ट खाका कोर्न सक्षम मेयर उम्मेदवार भएकाले एमाले मेयर जित्नेमा अडिग छ ।

विप्लव काफ्ले/ कालिका एफ एम