भरतपुर । भरतपुर महानगरपालिकाको वडा नम्बर–१२ सम्मको नतिजामा यसपटक वडा नं–१, २, ३, ११ र १२ मात्र एमाले उमेदवार रेनुभन्दा अगाडि छन् । अघिल्लो निर्वाचनमा वडा–४, ६, ७ र ८ मा मात्र एमाले उमेदवार रेनुभन्दा पछि थिए ।

भरतपुर महानगरपालिका वडा नं–११ लाई नेकपा एमालेले आफ्नो गढको रुपमा लिने गरेको छ । महानगरका अन्य वडाहरुमा पार्टी इतरको नतिजा आए पनि ११ नम्बरमा भने पार्टीको तर्फबाट जोकोही उमेदवार बने पनि चुनाव जित्ने पार्टीसम्बद्ध नेता तथा कार्यकर्ताको बुझाइ छ । सोहीअनुसार यसपटकको स्थानीय निर्वाचनमा वडा नं–११ मा माओवादी केन्द्रका उमेदवार युवराज पौडेललाई पछि पार्दै एमालेका उमेदवार कमल मल्ल निर्वाचित भए ।

वडा आफूहरुले जित्ने र मेयरमा पनि यस वडाबाट ठूलो मतान्तर हुने पार्टीको विश्लेषण थियो । १० नम्बर वडाको परिणाम आउँदासम्म ३ हजार मतले अघि रहेकी मेयर उमेदवार रेनु दाहालसँगको मतान्तर घट्ने अनुमान गरिए पनि त्यस्तो हुन सकेन । यस वडामा एमालेका मेयर उमेदवार विजय सुवेदी जम्मा १ सय ५७ भोटले रेनुभन्दा अघि रहे । मतान्तरमा खासै अन्तर घटेन । यस वडामा विजयले पाएको मत ३ हजार ४ सय ५९ हो भने रेनुको ३ हजार ३ सय २ हो ।

अघिल्लोपटकको स्थानीय चुनावमा यस वडामा तत्कालीन मेयर उमेदवार देवी ज्ञवाली र रेनुबीच १ हजार १ सय ६२ मतको अन्तर थियो । त्यसैअनुरुपको अन्तर आउने अपेक्षा गरिएको भए पनि परिणाममा नदेखिएको एमालेका तर्फबाट भरतपुर महानगर मेयर उमेदवार विजय सुवेदी बताउँछन् । आफ्नो किल्लामै सोचेजस्तो नभएपछि अर्को राम्रो मानिएको वडा नं–१२ को नतिजा राम्रो आउनेमा पार्टी आशावादी देखियो । यो सुवेदीको घर भएको वडा पनि हो । फलतः वडा नं–११ को तुलनामा १२ मा मतान्तर केही घट्यो । यस वडामा विजयले १ हजार ८ सय १ मत पाउँदा रेनुले १ हजार ५ सय २४ मत पाइन् । यहाँ जम्मा २ सय ७७ मत विजयले बढी पाएका छन् । कतिपय वडामा एमालेका वडा अध्यक्ष उमेदवारभन्दा ५ सय कम मत सुवेदीलाई परेको छ ।

वडा नं–१० मा नेपाली कांग्रेसका परमेश्वर खनालले २ हजार ४२८ मत पाउँदा एमालेका भक्तिप्रसाद गौतमले २ हजार १०१ मत पाए । मेयरमा रेनु दाहालले १९९३ र विजय सुवेदीले १८५१ मत पाए । वडा नम्बर–११ मा नेकपा एमालेका कमल मल्लले ३९०१ र माओवादीका युवराज पौडेलले ३०४१ मत पाए । यसै वडामा रेनु दाहालले ३४५९ र विजय सुवेदीले ३३०२ मत पाए । भरतपुर–१२ मा नेकपा एमालेले २०४० र समाजवादीले १५६६ मत पायो भने रेनु दाहालले १५२४ र विजय सुवेदीले १८०१ मत पाए ।