भरतपुर । चितवनमा चेपाङ जनप्रतिनिधिको संख्या बढेको छ । यसपटकको स्थानीय तहको निर्वाचनबाट २० जना जनप्रतिनिधि चेपाङ समुदायका रहेका छन् । राप्ती नगरपालिकामा २ वडाध्यक्षसहित ६ जना, इच्छाकामना गाउँपालिकामा २ वडाध्यक्षसहित ८ जना र कालिका नगरपालिकामा २ वडाध्यक्षसहित ६ जना जनप्रतिनिधि चेपाङ समुदायका छन् । राप्ती नगरपालिकामा चेपाङ समुदायबाट दुई वडाध्यक्ष र चार जना सदस्य गरी ६ जना जनप्रतिनिधि आएका छन् । उनीहरु राप्ती–१२ र १३ नम्बर वडाबाट निर्वाचित भएका हुन् ।
राप्ती नगरपालिकाको वडा नं–१३ को वडाध्यक्षमा अशोककुमार प्रजा ५०३ मत ल्याएर निर्वाचित भए । उनी गठबन्धनको सहयोगमा नेपाली कांग्रेसबाट उमेदवार बनेर निर्वाचित भएका हुन् । उनको निकटतम प्रतिद्वन्द्वी पनि चेपाङ समुदायबाट उमेदवार बनेका नेकपा एमालेका सूर्यबहादुर प्रजाले ५०० मत ल्याएका थिए ।
राप्ती नगरपालिकाको १२ नम्बर वडाको वडाध्यक्ष पनि चेपाङ छन् । राप्ती–१२ को वडाध्यक्षमा आइतबहादुर प्रजा ४९६ मत ल्याएर निर्वाचित भएका हुन् । उनी नेकपा एमालेका हुन् । उनले स्वतन्त्रबाट उमेदवार बनेका हरिबहादुर तामाङलाई पराजित गरेका हुन् । तामाङको ३८४ मत आएको थियो ।
राप्ती–१३ मा २ जना सदस्य पनि चेपाङ समुदायबाट आएका छन् । यस वडाका दुई जना सदस्य आइतबहादुर प्रजा एमालेबाट र विष्णुबहादुर प्रजा कांग्रेसबाट निर्वाचित भएका छन् । राप्ती–१३ मा महिला सदस्य पनि चेपाङ समुदायकी छन् । यस वडाको महिला सदस्यमा नेपाली कांग्रेसबाट पानमाया प्रजा निर्वाचित भएकी छन् ।
राप्ती–१२ मा एक जना सदस्य चेपाङ समुदायबाट निर्वाचित भएका छन् । नेपाली कांग्रेसबाट जीतबहादुर प्रजा राप्ती–१२ को सदस्यमा निर्वाचित भएका हुन् ।
चितवनको एकमात्र गाउँपालिका इच्छाकामनामा २ जना वडाध्यक्षसहित ८ जना जनप्रतिनिधि चेपाङ समुदायका छन् । इच्छाकामनाको वडा नम्बर–२ र ६ का वडाध्यक्ष चेपाङ समुदायबाट निर्वाचित भएका जनप्रतिनिधि छन् । वडा नं–२ मा पञ्चबहादुर प्रजा र वडा नं–६ मा लक्ष्मण चेपाङ निर्वाचित भएका हुन् । वडा नं–६ मा एमालेका लक्ष्मण प्रजाले ७९७ मत ल्याएर निर्वाचित भए । लक्ष्मण चेपाङ संघ चितवनका पूर्वअध्यक्ष पनि हुन् । उनले नेपाली कांग्रेसका विराज गुरूङलाई पराजित गरेका थिए । गुरूङले ५७६ मत ल्याएका थिए ।
वडा नं–२ मा एमालेबाट उमेदवार बनेका पञ्चबहादुर प्रजाले ६८३ मत ल्याई निर्वाचित भएका हुन् । उनले नेकपा माओवादी केन्द्रका प्रकाश बुढाथोकीलाई हराएका हुन् । बुढाथोकीले ५१४ मत ल्याएका थिए ।
इच्छाकामना–१ मा चार जना सदस्य चेपाङ समुदायका छन् । वडा नं–१ मा दुई जना सदस्यमा प्रेमबहादुर प्रजा र विक्रम चेपाङ निर्वाचित भएका छन् । यस वडामा महिला सदस्यमा अन्जु चेपाङ र दलित महिला सदस्यमा दुर्गा प्रजा निर्वाचित भएका हुन् ।
इच्छाकामना–३ मा एक सदस्य चेपाङ समुदायबाट निर्वाचित भएका छन् । यस वडामा माओवादी केन्द्रबाट सदस्यमा निर्वाचित भएका डिलबहादुर प्रजा हुन् । यस्तै, इच्छाकामनाको वडा नं–७ मा गनिराज प्रजा सदस्यमा निर्वाचित भएका छन् ।
कालिका नगरपालिकामा पनि चेपाङ समुदायबाट ६ जना जनप्रतिनिधि आएका छन् । कालिका–९, १० र ११ नम्बर वडामा चेपाङ जनप्रतिनिधि आएका हुन् । वडा–१० र ११ को वडाध्यक्ष चेपाङ समुदायका छन् । कालिका–१० मा नेपाली कांग्रेसबाट नरजंग प्रजा विजयी भएका हुन् । उनले एमालेका धनवीर प्रजालाई हराएका हुन् । नरजंगले ४९२ मत ल्याएका थिए भने धनवीरको ३०१ मत आएको थियो ।
कालिका–११ मा एक वडाध्यक्षसहित ३ जना जनप्रतिनिधि चेपाङ हुन् । कालिका–११ मा एमालेका कृष्णबहादुर प्रजाले कांग्रेसका वकिल चेपाङलाई हराएका थिए । कृष्णबहादुरले ५१३ मत ल्याएका थिए भने वकिलले ४६३ मत ल्याए । यस वडामा मिलन चेपाङ र लोकबहादुर प्रजा सदस्यमा निर्वाचित भएका छन् भने महिला सदस्यमा सीतामाया चेपाङ निर्वाचित भएकी छन् । यस्तै, कालिका–९ मा छोनलाल प्रजा सदस्यमा निर्वाचित भएका छन् ।
वैशाख ३० गते भएको स्थानीय तहको निर्वाचनमा चितवन जिल्लाबाट ४६ जना चेपाङ समुदायबाट उमेदवार बनेका थिए । चितवनको चार पालिकामा नौ जना वडाध्यक्षमा र ३७ जना वडा सदस्यमा चेपाङ समुदायबाट उमेदवार बनेका थिए ।
