खैरहनी । खैरहनी–१०, मुसहर बस्तीमा बुबाको यातनापछि आमाले ज्यान गुमाएपछि टुहुरा बनेका स्वर्गीय गीता माझीका दुई छोरीको राप्ती नगरपालिका निवर्तमान उपमेयर इमानसिं लामा अभिभावक बनेका छन् । आइतबार गीताको घर पुगेर लामाले उनीहरुको अभिभावकत्व ग्रहण गरेका हुन् ।
स्व. गीताका तीन छोरीमध्ये जेठी छोरीको विवाह भइसकेको छ भने दुई छोरी १६ वर्षीया निशा र १४ वर्षीया सुस्मिता घरमा छन् । अहिले सुस्मिता आमाको किरियामा बसेकी छन् । उनीहरुलाई भेट्न पुगेका लामाले स्थानीय जनप्रतिनिधिहरुसँगको समन्वयमा अभिभावकत्व ग्रहण गरेका हुन् ।
कान्छी सुस्मिताले पढ्ने इच्छा व्यक्त गरेकी छन् भने माइली छोरी निशाले सीप सिकेर स्वरोजगार बन्न चाहेकी छन् । आइतबार लामाले पाँच हजार रुपैयाँ सहयोग गरे । सुस्मितालाई कक्षा १२ सम्म अध्ययन गर्नका लागि आवश्यक पर्ने सबै खर्च व्यहोर्ने निवर्तमान उपमेयर लामाले बताए ।
घटनापश्चात सुस्मिता र निशालाई विभिन्न संघसंस्थाले संरक्षण गर्ने इच्छा जनाएका छन् । श्रीमान् रामचन्द्रले मलद्वारबाट लठ्ठी घुसाउँदा गम्भीर घाइते भएकी उनको गीताको जेठ १६ गते निधन भएको थियो । विभिन्न संघसंस्थाले दुई छोरीलाई संरक्षणका लागि लैजान अनुमति माग्न आएपछि खैरहनी नगरपालिकाले भने केही समय कुर्न भनेको छ ।
खैरहनी नगरपालिका प्रमुख शशिकुमार खनियाले उनीहरु अहिले किरियामा रहेकाले तत्काल निर्णय गर्न नसक्ने भन्दै सल्लाह गरेर अघि बढ्ने बताएका छन् ।
