निराज रानाभाट , भरतपुर , चितवन : मोफसलको चर्चित ` लक्की मिडिया प्रा.लि. ´ द्वारा सञ्चालित चितवन खबर गौरवमय १२ औं वर्षमा प्रवेश गरेको छ । वार्षिकोत्सबको विभिन्न कार्यक्रम मध्ये जेठ २५ गते , बुधबार ( अाज ) चितवन जिल्लाको भरतपुर महानगरपालिका – ०७ , कृष्णपुरस्थित तारापुञ्ज रिसोर्टमा चितवन खबरले टि-सर्ट सार्वजनिक गरेको छ । कार्यक्रममा लक्की मिडिया प्रा.लि. का कर्मचारी , पत्रिका अनलाइनका पाठक एवम् विज्ञापनदातालाई टि-सर्ट वितरण गरिएको हो ।
कार्यक्रममा नेपाल मेडिकल काउन्सिलका कार्यकारी सदस्य वरिष्ठ मेडिकल अन्कोलोजिष्ट डाक्टर गुरु शरण शाहको प्रमुख आतिथ्यतामा भएको हो । उनले १२ औं वर्षमा प्रवेश गरेकोमा चितवन खबर पत्रिकालाई शुभ-कामना सहित आगामी दिनमा सफलताको कामना गरे । कार्यक्रमका अतिथि युवा व्यवसायी दिपक बस्नेतले १२ औं वर्षसम्म चितवन खबर पत्रिकाले गरेका कामको प्रशंसा गरेका थियो ।
वार्षिकोउत्सबको अवसरमा चितवन खबर पत्रिकालाई चितवन प्रिन्ट हाउसले १०० थान टि-सर्ट सहयोग गरेको हो । प्रिन्ट हाउसका सन्चालिका रेजिना बस्नेतले चितवनको चर्चित चितवन खबर पत्रिकालाई वार्षिकोउत्सबको अवसरमा सहयोग गर्न पाउँदा खुसी लागेको बताए । साथै सफलताको शुभ-कामना समेत दिएका थिए ।
लक्की मिडियाका महा-प्रबन्धक हरि कार्की ‘ लक्की ‘ को सभापतित्वमा कार्यक्रम सम्पन्न भएको हो । उनले हाम्रो चितवन खबर पत्रिका र अनलाइन संस्करण साथै इ चितवन खबर डट कमले सयौं न्यूज पोर्टलका बीच स्वस्थ प्रतिस्पर्धा गरिरहेको बताए । उनले भने ” हामी हाम्रा सबै प्रकाशनहरूलाई अझ सशक्त बनाउन निरन्तर लागि पर्ने छौं , आम पाठक , दर्शक , श्रोता नै हाम्रो प्रतिबद्धता र प्रेरणाका स्रोत हुन , स्वच्छ , तटस्थ , निष्पक्ष समाचार सम्प्रेषणमा बिचलित हुने छैनौं । यसका लागि सदा झैं हामीलाई सबैको साथ रहने विश्वास लिएका छौं । ” रामजी कुवरको संयोजकत्वमा भएको कार्यक्रमको सहजिकरण राजेश शर्मा आचार्यले गरेका थिए ।
यसैबीच , चितवन खबर पत्रिकाले आफ्नो वार्षिकोउत्सबको राजधानी काठमाडौंमा भव्य कार्यक्रमका साथ गर्ने भएको छ । चर्चित कलाकार एवम् राजनैतिक दलका नेताहरूको उपस्थितिमा यहीँ जेठ २७ गते कार्यक्रम हुने महा-प्रबन्धक हरि कार्की ‘ लक्की ‘ ले जानकारी दिए ।
