भरतपुर । नारायणी पुलको रेलिङ भाँचिएको  करिब एक महिना पुग्न लाग्दा  पनि  सो को  मर्मत हुन सकेको छैन । पुलको रेलिङ मर्मत नहुँदा पुलमा हिंड्ने  पैदलयात्री जोखिम मोलेर पुलमा हिँड्नु परेको छ । पूर्व–पश्चिम राजमार्गमा पर्ने उक्त पुलको म्याद सकिएको पनि वर्षाैं भइसकेको छ ।

जेठ ६ गतेको हावाहुरीले पुलमाथिको बिजुलीका पोल ढल्दा पुलका रेलिङ भाँचिएका थिए । विद्युत् प्राधिकरण भरतपुर वितरण केन्द्रले बिजुलीका पोल हटाइसके पनि सडक डिभिजनले भने अहिलेसम्म रेलिङ हालेको छैन । ठूला सवारीसाधन हिँड्दा पुल नै हल्लिने गर्छ ।

रेलिङ भाँचिएको ठाउँबाट पैदलयात्री कुनै दिन नदीमा खस्ने जोखिम छ । पुलमा हिँड्ने पैदलयात्री जुनसुकै बेला नदीमा खस्ने सम्भावना बढेको भरतपुरका विष्णु भूषाल बताउँछन् । ‘रेलिङ भाँचिएको २५ दिन भइसक्दा पनि मर्मत नगरिनु गम्भीर लापर्बाही हो’, उनी भन्छन्, ‘यति ठूलो पुलको मर्मतमा हेलचेक्र्याइँ गर्नु गम्भीर विषय हो ।’

चितवन र नवलपरासी जोड्ने यो पुल भएर दैनिक हजारौँ पैदलयात्री यात्रा गर्छन् । नारायणी पुल पछिल्लो समय आत्महत्या गर्ने ठाउँको रुपमा पनि प्रयोग हुन थालेको छ । होचा रेलिङबाट मानिस सजिलै नदीमा हाम फाल्न सक्ने भएकाले हाम फाल्न नमिल्ने गरी संरचना बनाउनुपर्ने कुराहरु पनि बेलाबेलामा उठ्ने गरेका छन् ।

चालू आर्थिक वर्ष २०७८/७९ मा नारायणी पुलबाट चार पुरूष र चार महिला गरी आठ जनाले आत्महत्याको प्रयास गरे । जसमध्ये एक महिलाको मृत्युु भयो भने सात जनाको उद्धार भएको जिल्ला प्रहरी कार्यालय चितवनका डिएसपी रविन विष्टले जानकारी दिए ।

गत आर्थिक वर्ष २०७७/७८ मा पनि तीन जनाले पुलबाट नदीमा हाम फालेर आत्महत्याको प्रयास गरेका थिए । पुलको रेलिङलाई अग्लो बनाउँदा पनि पुलबाट हाम फालेर हुने आत्महत्याको प्रसासलाई रोक्न केही मद्दत मिल्ने उनी बताउँछन् । त्यस्तै, उनले सम्भावित दुर्घटनालाई न्यूनीकरण गर्न भाँचिएका रेलिङ जतिसक्दो छिटो मर्मत गर्नुपर्ने बताए ।

पुलको दुवै साइडमा पैदलयात्रीका लागि फुटपाथ बनाइएको छ । पुलको उत्तरतर्फका रेलिङ भाँचिएको हो । पुलको रेलिङ मर्मत गर्ने मान्छे नभेटिँदा मर्मतको काममा ढिलाइ भएको सडक डिभिजन भरतपुरका प्रमुख बाबुराम सापकोटा बताउँछन्। ‘थोरै काम भएकोले मान्छे खोज्दा भेटिएको छैन’, उनी भन्छन्, ‘रेलिङ वेल्डिङ गर्न मान्छे खोजिरहेका छौँ, छिट्टै मर्मत गर्छाैं ।’

• स्रोत : इचितवनपोस्ट