शर्माले आफ्नो तर्फबाट आगामी आर्थिक वर्षका लागि करका दर हेरफेरका गर्न बजेट निर्माणमा संलग्न अर्थसचिवहरू मधु मरासिनी र कृष्णहरि पुस्करको टोलीलाई पूर्वनासु घिमिरेले जे भन्छन् त्यही मान्न निर्देशन दिएका थिए। घिमिरेले भनेझैँ करका दरहरू हेरफेर गरिएको छ।

अर्थमन्त्रीको स्वीकृतिमा घिमिरेले छानीछानी व्यापारिक घरानाहरूलाई फाइदा हुनेगरी करका दर हेरफेर गरेका छन्। केही सामानको कर निर्धारण गर्न छुटेको छ।

शर्माको राजीनामा प्रधानमन्त्री देउवाले रोक्नुले व्यापारिक घरानाको फाइदाका लागि गरिएको करका दर हेरफेरमा उनको समेत समर्थन रहेको आशंका जन्मिएको छ।

प्रधानमन्त्रीले राजीनामा रोके पनि संसदमा प्रमुख प्रतिपक्षी दल एमालेले भने अर्थमन्त्रीमाथि छानबिन हुनुपर्ने माग राखेर सदन अवरुद्ध पारेको छ। सोमबार आफ्नै स्थगन प्रस्तावमाथि कार्यसूचीमा भएकाले सामान्य विरोध जनाएर सदन चलाउन तयार देखिएको विपक्षी एमाले मंगलबारदेखि भने कडा रुपमा प्रस्तुत भएको छ।

एमालेले अर्थमन्त्री शर्माको राजीनामा माग्दै उनीमाथि छानबिन गर्न संसदीय समिति गठन हुनुपर्ने माग अघि सारेको छ। मंगलबार शर्माले संसदमा घटना तथ्यहिन रहेको जवाफ दिए पनि एमालेले त्यसप्रति असहमति जनाउँदै संसद अवरुद्ध पारेको थियो।

शर्माले आफ्नो बचाऊ गर्दै भनेका थिए, ‘बजेट निर्माण गर्दा राजस्वको दरहरू गर्न कुनै मान्छे रातको १२ बजे आएर चलखेल गर्‍याे भन्ने सन्दर्भमा जुन विषय उठेको छ। त्यो अत्यन्त भ्रामक, कपोकल्पित एउटा झुटा कथा बनाइएको छ । यसको म खण्डन गर्न चाहन्छु । खारेज गर्न चाहन्छु।’

एमालेले घटनाका छानबिन गर्दै बुधबार पनि संसद अवरोध जारी राख्ने तयारी गरेको छ।

प्रचण्डले गरे मन्त्रीसँग छलफल

माओवादी केन्द्रका अध्यक्ष पुष्पकमल दाहाल प्रचण्डले मन्त्री शर्मा विवादमा तानिएपछि दोस्रोपटक छलफल गरेका छन्।

आइतबार अर्थमन्त्री शर्मासँग मात्रै कुराकानी गरेका दाहालले मंगलबार भने उनीसहित उर्जामन्त्री पम्फा भुसाल र शिक्षा तथा विज्ञान प्रविधिमन्त्री देवेन्द्र पौडेलसहित सामूहिक छलफल गरेका छन्।

स्रोतका अनुसार दाहालले तीनैजना मन्त्रीको कामप्रति असन्तुष्टि जनाएका छन्।

समाचार स्रोत : देशसंचार