चितवनमा ६ महिनाको अवधिमा ६६ वटा मानव अधिकार उल्लंघनका घटना घटेको जानकारी प्राप्त भएको छ।
अनौपचारिक क्षेत्र सेवा केन्द्र (इन्सेक) चितवनले आज (सोमबार) भरतपुरमा सार्वजनिक गरेको तथ्यांक अनुसार चालु आर्थिक बर्ष २०७८–७९ को पुष १७ गतेदेखि जेठ मसान्तसम्म जिल्लाभर ६६ वटा मानव अधिकार उल्लंघनका घटना भएका हुन् ।
तथ्याङ्क अनुसार ६ महिनाको अवधिमा जिल्लाभर बालिका बलात्कारका घटना २५, महिला बलात्कारका घटना ४, बालयौन दुर्व्यवारका घटना १२, वहुविवाहका घटना ११, महिला बलात्कारपछि उपचारको क्रममा मृत्युका ३ घटना भएका छन् ।
यस्तै महिला बलात्कार प्रयासका घटना १, पुरुष हत्याका घटना २, आत्महत्या दुरुत्साहनका घटना ३, जनप्रतिनिधी दुर्व्यवारका घटना १, हातहतियारका घटना ३, हत्या प्रयासका २ वटा घटना भएका छन् ।
प्रतिवेदन सार्वजनिक गर्दै इन्सेक चिवतनका प्रतिनिधि दिपेन्द्र अधिकारीले अघिल्लो वर्षको सोही अवधिमा भन्दा अहिले मानवअधिकार उलंघनका घटनामा बढेको बताए । अघिल्लो वर्षको यसै अवधिमा ३८ वटा मानवअधिकार उल्लंघनका घटना भएका थिए ।
अधिकारीका अनुसार ०७७ पुस १७ देखि २०७८ असार मसान्तसम्मका ३८ मध्ये जिल्लाभर बालिका बलात्कारका घटना १३, बाल यौन दुरुपयोगका घटना १०, महिला बलात्कारका घटना ६, बालिका बलात्कार प्रयासका घटना ३ र महिला बलात्कार प्रयासका २ वटा घटना भएका छन् । यस्तै वहुविवाह ३ तथा आत्महत्या दुरुत्साहन र हत्याका समान १-१ वटा घटना भएका छन् ।
जिल्लामा मानव अधिकारका घटना अघिल्लो बर्षको तुलनामा घटना बढदै गएकोले न्युनिकरणको लागि सबैको ध्यान जान जरुरी रहेको उनले बताए ।
जिल्ला प्रहरी कार्यालय चितवनका प्रवक्ता प्रहरी नायव उपरिक्षक नरहरी अधिकारीले मानव उल्लंघनका घटनाहरु मध्य बालिका बलात्कारका घटनाहरु बढ्दै गएकाले अभिभावकहरु संवेदनशिल हुनुपर्ने बताए ।
यस्ता प्रकृतिका घटनाहरु आफ्नै घरपरिवार, नातागोता, छरछिमेकबाटै हुने भएकाले बालबालिकालाई बढी मात्रामा निगरानीमा राख्नुपर्नेमा उनको जोड थियो ।
जिल्लामा हुने यस्ता घटनाको न्युनिकरणकालागि प्रहरी प्रशासन गम्भीर भइ अघि बढेको बताउदै उनले मानव अधिकार उल्लंघन अन्त्य गर्न सबै पालिकाको भूमिका महत्वपूर्ण रहेको बताए ।
नेपाल पत्रकार महासंघ चितवनका अध्यक्ष नारायण अधिकारीले समाजमा अझै पनि हिंसा नघट्नु चिन्ता र बहसको बिषय भएको बताए । उनले हिंसा न्यूनीकरणका लागि सोच परिवर्तन गर्नुपर्ने बताए । समाजमा घटनाको प्रकृती डरलाग्दो गरी देखा परेको भन्दै संवेदनशिल भएर अघि वढ्नुपर्ने समय आएको बताए ।
मन्जुश्री असहाय संरक्षण केन्द्रकी अध्यक्ष मन्जु खाँडले पीडितलाई न्याय दिनुभन्दा पहिले उक्त घटनामा पीडकको संरक्षण र बचाउ गर्ने परीपाटी बढदै गएको बताइन् । पीडकको संरक्षण बढ्दै गर्दा समाजमा यस्ता प्रकृतिका घटना बढन् सक्ने उनको भनाई छ । पीडित घटना घटेर न्याय पाउने ठाउसम्म पुग्ने अवधी लामो भएकाले पनि कतीपय पीडितले न्याय नपाएको उनले बताईन् ।
