भरतपुर । भरतपुर विमानस्थल अगाडि रहेका घरटहराहरु ‘बलजफ्ती’ भत्काइएको छ । प्रहरी प्रशासनको बलमा डिभिजन सडक कार्यालय भरतपुरले विमानस्थलअगाडि रहेका सातवटा घरटहराहरु भत्काएको हो ।

विमानस्थलदेखि चौबिसकोठीसम्म ३२० मिटरमा परेमा सातवटा घरटहरा सडक डिभिजनले डोजरको प्रयोग गरेर भत्काएको छ । पुल्चोक–गोन्द्राङ सडक विस्तारको क्रममा परेका घरटहराहरु सम्पूर्ण प्रक्रिया पूरा गरेर हटाइएको सडक डिभिजन कार्यालयले जनाएको छ । कार्यालका निमित्त प्रमुख बाबुराम सपाकोटाले घरटहरा हटाउन सम्बन्धित धनीलाई पटकपटक आग्रह गरिएको बताए । उनले भने, ‘सडकको मध्येभागबाट दायाँबायाँ २५/२५ मिटरको क्षेत्र सडक क्षेत्राधिकार पर्छ । ती क्षेत्रमा परेका घरटहरा हटाउने जिम्मा डिभिजन सडक कार्यालयको हुन्छ ।’ उनका अनुसार सडक क्षेत्राधिकारमा परेका संरचना सूचना दिएर हटाइएको हो ।

उनीहरुले (घरधनीहरु) यस विषयलाई लिएर मुद्दा लड्छन् भने डिभिजन सडक कार्यालय पनि मुद्दा लड्न र खेप्न तयार भएको उनले बताए । सडकमा परेका घरटहरा हटाएर सडक विस्तार अभियानमा ढिलाइ भएको र जति भने पनि नछोडेका कारण बाध्य भएर घरटहरा भत्काउन परेको उनी बताउँछन् ।

असार ३१ गते सडक डिभिजनले तीनदिनको सूचना टाँसेर घरटहरा खाली गर्न निर्देशन दिएको थियो । तीनदिनको समय सकिएपछि मंगलबार सडकले प्रहरी प्रशासनको बलमा विमानस्थलअगाडि रहेका सातवटा घरटहरा हटाएको छ ।
भरतपुर विमानस्थलअगाडि रहेका सात घरटहरा भत्काउन डोजर पुगेपछि घरधनीहरुले घरको सामग्री निकालेका थिए । सूर्य गौतम, धर्मराज श्रेष्ठ, लीलाकान्त खनियाँ, अचुतराज पौडेल, डिलादेवी रिजाल, शिव ढकाल र चिरन्जीवी गौतमको घरटहरा भत्काइएको छ ।

घरधनी सूर्य गौतमले मुअब्जा नदिई सर्वोच्चमा मुद्दा चल्दाचल्दै प्रहरी लगाएर घर भत्काइएको बताए । उनले भने, ‘सर्वोच्चमा मुद्दा विचाराधीन अवस्थामा छ, यही असार २७ गते पेसी तोकिएको छ, फैसला नजिकै आउँदै गरेको समयमा एक रूपैयाँ पनि मुअब्जा नदिई जबर्जस्ती घर टहरा भत्काइएको छ ।’ उनले सडक डिभिजनविरूद्ध मानहानीको समेत मुद्दा हाल्ने बताए ।

उनीहरु सो ठाउँमा २००९ सालदेखि बस्दै आएका थिए । सात जना घरधनीको रातो पुर्जा छ । बर्सेनि जग्गाको तिरो तिरिरहेका छन् । समयसमयमा घरजग्गा किनबेच पनि भइरहेको छ ।

अर्का घरधनी निर्मल ढकाल आफूहरु अन्यायमा परेको बताउँछन् । उनी भन्छन्, ‘हामी यहाँ सात जनाको ४ धुरदेखि ६ धुरसम्मको जग्गामा बनेका घरटहराहरु भत्काइयो, लालपुर्जा छ । मुअब्जा नदिई हामीलाई लखेट्न मिल्छ ? हाम्रो श्रीसम्पत्ति भत्काउन पाइन्छ ?’ सातै जना घरधनीहरुले आफ्नो व्यवसाय चलाएर जीवन गुजारा गरेका थिए ।