भरतपुर । २०७४ सालतिर भरतपुर तथा नारायणगढ बजार क्षेत्रको फुटपाथ व्यवस्थापन करिब करिब सफल हुने चरणमा पुगेको थियो । तर, २०७६ सालको अन्त्यसँगै विश्वव्यापीरुपमा फैलिएको कोरोना भाइरस सङ्क्रमणको जोखिमका कारण भएको निषेधाज्ञाका कारण स्थानीय सरकारले फुटपाथ व्यवस्थापनमा ध्यान दिन सकेन । भरतपुर महानगरपालिकाले बालकुमारी माविको जग्गा भाडामा लिएरसमेत फुटपाथ व्यवस्थापन गर्ने प्रयास गरेको थियो भने पुरानो गणेश सिनेमा हलपछाडिको खाली ठाउँमा सवारी पार्किङको व्यवस्थापन गरेको थियो ।

बजारलाई सुन्दर बनाउने भरतपुर महानगरपालिकाको योजना कोरोना भाइरस सङ्क्रमणको जोखिमसँगै पूर्णरुपमा असफल नै साबित भयो । वातावरण केही सहज भएपछि भने स्थानीय तहको निर्वाचन नजिक आइसकेको हुँदा स्थानीय सरकारले फुटपाथ व्यवस्थापनलाई कडाइ गर्न सकेन । र, फुटपाथमा फेरि पहिलेजस्तै व्यापार व्यवसाय मौलाउन थाल्यो ।
तर, अब भने जिल्ला ट्राफिक प्रहरी कार्यालय चितवनले पुनः बजारलाई व्यवस्थित बनाउने योजनासहित फुटपाथ व्यवसायलाई सडकबाट हटाउने प्रयास गरेको छ । बजारका सडकमा व्यवसाय गर्ने र पार्किङ निषेधित क्षेत्रमा पार्किङ गर्नेलाई पनि कारबाही थालेको छ । विशेषगरी, पुलचोक–शहीदचोक–लायन्सचोक क्षेत्रआसपासमा बढी भीड हुने भएकोले त्यस क्षेत्रमा केन्द्रित भएर व्यवस्थापनमा लागेको जिल्ला ट्राफिक प्रहरी कार्यालय चितवनका प्रमुख एवम् प्रहरी निरीक्षक धर्मबहादुर अधिकारीले जानकारी दिए ।

पुलचोकबाट न्यूरोडतर्फको सडक, मेनरोड, शहीदचोकबाट बेलचोक तथा उत्तरतर्फको मिलनरोड, लायन्सचोकबाट आनन्दमार्गतर्फको सडक, वीरेन्द्र क्याम्पसबाट रमाइलोचोकतर्फको सडक, चौबीसकोठीबाट त्रिचोकतर्फको सडकलगायतका मुख्य सडक र चोकमा हुने गरेको अव्यवस्थित सवारी र फुटपाथ व्यवस्थापनलाई हटाउने काम सुरू भएको उनले बताए ।

सडकमा जथाभावी पार्किङ गर्ने सवारीसाधनलाई तत्काल कारबाही गर्ने काम भइरहेको उनले बताए । बजारको व्यस्त क्षेत्रमा जथाभावी पार्किङ गरिदिँदा पैदलयात्रु र बजार आउने ग्राहकहरुको सवारीसाधन रोक्ने ठाउँ नहुने समस्याले गर्दा बजारमा बढी कार्यालय भएका स्थानबाहिर कर्मचारीहरुको सवारीसाधन दिनभर रोक्न नपाइने व्यवस्था गरिएको उनले बताए । कतिपय स्थानमा एकतर्फी पार्किङको व्यवस्था गरिएको प्रहरी निरीक्षक अधिकारीको भनाइ छ ।

बजारमा भद्रगोल अवस्थामा आइपुगेको ट्राफिक व्यवस्थापनलाई बिस्तारै सहज बनाउँदै लैजाने योजनासहित काम गर्ने प्रयास गरिएको उनले बताए । भरतपुर महानगरपालिका, उद्योग वाणिज्य संघ–चितवन तथा सम्बन्धित बजार व्यवस्थापन समितिसँग बसेर छलफल गरेरै बजारको मुहार फेर्ने प्रयास भइरहेको उनले बताए । भरतपुर महानगरपालिकाबाट पनि नयाँ कार्यकालका लागि आएको जनप्रतिनिधिबाट सकारात्मक सहयोग मिलेको ट्राफिक प्रहरीले जनाएको छ । भित्री सडकहरुमा समेत अवस्था हेरेर सवारी पार्किङको व्यवस्था मिलाउँदै आएको छ ।