काठमाडौं। तुइनबाट खसेर दार्चुलाको ब्यास गाउँपालिका–२, छुम्लिङमा एक युवक बेपत्ता भएका छन् । भारतबाट नेपालतर्फ आउने क्रममा तुइन चुँडिदा स्थानीय १८ वर्षीय सचिन बुढाथोकी महाकाली नदीमा खसेर बेपत्ता भएका हुन् ।
गृहमन्त्री बालकृष्ण खाणले बेपत्ता भएका बुढाथोकीको खोजीकार्य तीव्र बनाउन निर्देशन दिएका छन्।
गृहमन्त्री खाणले दार्चुलाका प्रमुख जिल्ला अधिकारी दीर्घराज उपाध्याय, सशस्त्र प्रहरी बल सुदूरपश्चिम प्रदेश प्रमुख सशस्त्र प्रहरी नायब महानिरीक्षक दुर्गाप्रसाद भट्टराई र नेपाल प्रहरीका सुदूरपश्चिम प्रदेश प्रमुख प्रहरी नायब महानिरीक्षक मोहन आचार्यलाई टेलिफोन गरी बेपत्ता बुढाथोकीको खोजी कार्य तीव्र बनाउन निर्देशन दिएका छन्।
सशस्त्र प्रहरी नायब महानिरीक्षक भट्टराईले खोजी तीव्र पार्दा अहिलेसम्म फेला पार्न नसकिएको बताए। बिहीबार थप फौज पठाएर खोजी कार्य तीव्र बनाइने उनले बताए।
बुढाथोकी बुधबार अपरान्ह ३ः३० बजे भारीसहित भारतबाट नेपाल आउने क्रममा तुइन चुँडिएर नदीमा खसी बेपत्ता भएको जिल्ला प्रशासन कार्यालय दार्चुलाले जनाएको छ।
दार्चुलाका सीमा क्षेत्रका बासिन्दा किनमेलका लागि भारतीय बजार जाने गर्छन् । सीमा पार गर्नका लागि पक्की पुल नभएका कारण तुइन चढ्नुपर्ने बाध्यता छ। तुइन के कारण चुँडियो भन्ने हालसम्म खुलिसकेको छैन ।
स्थानीयबासिन्दाका अनुसार अहिले युवक बेपत्ता भएको स्थान गत वर्ष भारतीय पक्षले तुइन काटिदिँदा जयसिंह धामी बेपत्ता भएको ठाउँ नजिकै पर्छ ।
