भरतपुर । नवलपुर घर भई सम्बन्धविच्छेद गरेर बसेकी २५ वर्षकी युवती र ४७ वर्षको विवाहित पुरूषबीच फेसबुकमा आएको फ्राइन्ड रिक्वेस्टपछि आपसमा चिनजान र गफगाफ बाक्लिँदै गएपछि भेटघाटको चाहना भयो ।
कुनै कफी हाउसमा भेटघाट पनि भयो । भेटघाट र भलाकुसारीपछि पुरूष व्यक्ति महिलाको मायाजालमा यसरी फसे कि उनले पटकपटक गरेर २५ लाख रूपैयाँसम्म युवतीलाई दिए । घरपरिवारको साथ रहे पनि पुरूष युवतीतिर लोभिए ।
त्यसपछि युवती बिस्तारै सम्पर्कबाट टाढिन थालिन् । पुरूष छाँगाबाट खसेजस्तो भए र आफू ठगिएको भनी प्रहरीकहाँ पुगे । उनीविरूद्ध ठगी आरोपमा निवेदन दिए ।
चितवन नारायणगढकै एक पुरूषलाई हनी ट्रयापमा पारेर ठगी आरोपमा एक युवतीविरूद्ध चितवन प्रहरीले मुद्दा चलाएको छ । राम्रो जीउडाल भएकी ती युवतीले पुरूषलाई शरीरका अन्तरङ्ग फोटाहरु पनि पठाउने गरेको पाइएको छ ।
वास्तविक नाम लुकाएर फेसबुकमार्फत पुरूषलाई आकर्षित गर्न सफल उनले आठ लाख रूपैयाँ लिएपछि पुनः अर्को नाम राखेर सोही पुरूषसँग थप पैसा मागेको प्रहरी प्रवक्ता डिएसपी नरहरि अधिकारीको भनाइ छ । आफ्नो, आमाको र साथीको नाममा पैसा पठाइदिनू भन्ने ती युवतीले घरमा दुःख भएको कारण पैसा चाहिएको बताउने गरेकी थिइन् ।
‘राम्रो आम्दानी भएका, आर्थिकरुपमा सम्पन्न रहेका तर विवाह भएका पुरूषसँग कसैले सम्बन्ध बढाउँछ भने सावधानी अपनाउनुस्, नत्र त्यो हनी ट्रयाप हुन सक्छ’, चितवन प्रहरी प्रमुख एसपी नवराज अधिकारीले भने, ‘ठगी गर्ने नयाँ प्रवृत्ति चितवनमा पनि भेटिएको छ ।’
‘बिहे भएका वा नभएका जोकोही मानिस क्षणिक परिचयमा प्रेम सम्बन्ध र सङ्गतमा रहेका छन् भने सावधानी अपनाउन जरूरी छ’, उनले भने । नयाँ–नौलो मानिससँग छिटै नजिक हुने कारणले मानिसहरु पनि अपराधको सिकार बन्ने गरेको र डिप्रेसनमा जाने, पारिवारिक विखण्डन हुनेजस्ता अन्य अपराध सृजना हुने गरेको डिएसपी प्रवक्ता नरहरि अधिकारीले बताए ।
प्रहरीका अनुसार हनी ट्रयापमा पार्ने युवक तथा युवती सुन्दर हुन्छन् । ‘उनीहरु व्यक्तिगत वा आपराधिक समूहको योजनामा परिचालित भएका हुन्छन्, जसको उद्देश्य सम्पत्ति भएको परिवारलाई नाटकीय ढङ्गले लुट्नु, ब्ल्याकमेल गर्नु हुन्छ’, प्रवक्ता अधिकारीले भने । सामाजिक सञ्जालमार्फत विभिन्न आर्थिक अपराध हुने गरेको प्रहरीको भनाइ छ ।
सामाजिकरुपमा प्रतिष्ठित व्यवसायीहरु यसको सिकार हुने गरेका छन् । परिवार, समाजको डरका कारण अपराध लुकाउने गरेको र थप पीडित बन्ने गरेको प्रहरीको भनाइ छ ।
