भरतपुर । सोमबार बिहान १ः३० बजेको समयमा चितवनको भरतपुर महानगरपालिका वडा नं १ पोखरा बसपार्कनजिकै ट्रकले स्कुटरलाई ठक्कर दिँदा एक जनाको मृत्यु भएको छ । एक जना गम्भीर घाइते भएका छन् ।
पुल्चोकबाट मुग्लिनतर्फ जाँदै गरेको ना ५ ख ८४९७ नम्बरको ट्रक र भित्री सडकबाट पोखरा बसपार्क जाने मुख्य सडक पार गरेर जान लागेको ना २६ प ४८५१ नम्बरको स्कुटर ठक्कर खाँदा स्कुटर पछाडि सवार इच्छाकामना गाउँपालिका वडा नं ३ निवासी २१ वर्षीय सन्दीप गुरुङको नयाँ मेडिकल कलेजमा उपचारको क्रममा बिहान २ः०५ बजेको समयमा मृत्यु भएको छ ।
स्कुटर चालक नवलपुर गैँडाकोट ४ बस्ने २१ वर्षीय मनीष लामा गम्भीर घाइते भई नयाँ मेडिकल कलेजमा उपचार भइरहेको र ठक्कर दिने ट्रक र चालक नियन्त्रणमा रहेको प्रहरीले जनाएको छ ।
