शैक्षिक परामर्श संस्था  कंगारु एजुकेसन फाउण्डेसनले भरतपुरको सिजील्याण्डमार्कमा सुविधासम्पन्न कार्यालय स्थापना गरेको छ । यसअघि लायन्सचोकबाट सेवा प्रदान गर्दै आएपनि नयांँ संरचना र सेवासहित ल्याण्डमार्कको तेस्रो तल्लाबाट सेवा शुरु गरेको हो । आज (बुधबार) एक कार्यक्रमका बीच वागमती प्रदेशका उद्योग वाणिज्य तथा आपूर्ति मन्त्री मिलनबाबु श्रेष्ठले कार्यालयको उद्धघाटन गर्नुभयोे । मन्त्री श्रेष्ठले पछिल्लो समय शैक्षिक परामर्श संस्था खुल्ने क्रम बढेको भन्दै गुणस्तरीय सेवा दिनुपर्नेमा जोड दिनुभयो । शैक्षिक संस्थाहरुले सही परामर्श दिनुपर्नेमा जोड दिनुभयो ।
प्राप्त गरेका ज्ञान, सीपलाई विद्यार्थीले स्वदेशमै प्रयोग गर्नुपर्ने बताउनुभयो ।

फाउण्डेशनका सिईओ महेशबाबु तिमिल्सिनाले सही परामर्श संस्था छनौट गरी बुझेर मात्र विद्यार्थीले विदेश अध्ययन गर्न जान सुझाव दिनुभयो । विदेश पढ्न जानुअघि कलेज, विश्वविद्यालय, संकायको साथै त्यस देशको कला,संस्कृति जीवनशैली, कामको प्रकृति र  कानुनको बारेमा जानकारी लिएर मात्र विदेश पढ्न जान तिमिल्सिनाले सुझाव दिनुभयो । इक्यान, चितवनका अध्यक्ष समुन्द्र अर्यालले नेपालमा शैक्षिक परामर्शको बाढी आएको भन्दै मापदण्ड नपुगी सञ्चालनमा आएका शैक्षिक परामर्श संस्थाहरुको सरोकारवाला निकायले नियमन अनुगमन गर्नुपर्नेमा जोड दिनुभयो । विद्यार्थीलाई भ्रममा नपरी शिक्षा मन्त्रालयबाट सम्बन्धन लिएका शैक्षिक परामर्श संस्थाबाट मात्र भिषा एप्लाई गर्न आग्रह गर्नुभयो । फाउण्डेशनका चितवनका  निर्देशक विशालबाबु चापागाईंले चितवन लगायत छिमेकी जिल्लाका विद्यार्थीलाई अनुकल र सहजताको लागि सिजी ल्याण्डमार्कको भवनबाट सेवा शुरु गरिएको बताउनुभयो । कार्यक्रममा क्यानडा वेष्ट युनिभर्सटीका कन्ट्री मेनेजेर नेत्र कोईराला, युएसए, युके,अष्ट्रेलिया, क्यानडा, न्यूजिल्याण्डका प्रतिनिधी, नेपाली कांँग्रेस, चितवनका सचिव ध्रुवराज पोखरेल लगायतको सहभागिता रहेको थियो । फाउण्डेसनले आज सिजील्याण्डमार्कको सभाहलमा एजुकेसन सेमिनार गरेको हो ।