भरतपुर महानगरपालिकाले वार्षिक कार्यक्रम अनुसार प्राविधिक उच्च शिक्षा स्नातक र स्नातकोत्तर अध्ययन गर्ने विद्यार्थीलाई छात्रवृत्ति वितरण गरेको छ ।

भरतपुर महानगर प्रमुख रेनु दाहाल र उपप्रमुख चित्रसेन अधिकारीले संयुक्त रूपमा विद्यार्थी एवम् अभिभावकलाई आज चेक हस्तान्तरण गरेका हुन् । छात्रवृत्ति कार्यक्रममा छनोट भएका छात्रछात्राहरूले एक वर्षको लागि १० हजार रुपैयाँ पाएका छन् ।

महानगरले छात्रवृत्ति पाउन पाँच वटा सीमा निर्धारण गरेको थियो । छात्रवृत्ति पाउन अपाङ्गता, लोपोन्मुख, अति सीमान्तकृत, दलित तथा सहिद परिवारका विद्यार्थी हुनुपर्ने प्रावधान थियो ।
यस अन्तरगत नगर विकास योजनाको आर्थिक वर्ष ०७८/०७९ स्वीकृत वार्षिक कार्यक्रममा भरतपुर महानगरपालिकाभित्र स्थायी बसोबास गर्ने ८ जना विद्यार्थी छनोट भई छात्रवृत्ति पाएका छन् ।

महानगरले प्रमाणपत्र तहमा ६ सय ९२ जना विद्यार्थीहरूलाई छात्रवृत्ति दिँदै आइरहेको भए पनि यस वर्षदेखि उच्च शिक्षा अध्ययन गर्ने विद्यार्थीलाई लक्षित गरी यो कार्यक्रम लागू गरिएको महानगर प्रमुख रेनु दाहालले बताइन् ।

भरतपुरको शिक्षा विकासलाई थप अगाडि बढाउन उच्च शिक्षा पढ्ने विद्यार्थीलाई प्रोत्साहन गर्न यो कार्यक्रम लागू गरिएको मेयर दाहालको भनाइ छ । यो कार्यक्रमले आगामी वर्ष पनि निरन्तरता पाउने महानगरले जनाएको छ ।

महानगरपालिकाले यो छात्रवृत्ति ५० जनालाई दिने व्यवस्था गरे पनि ८ जना मात्रै छनोट भएका छन् । यो पहिलो वर्ष भएकाले सबै विद्यार्थीलाई छात्रवृतिबारे जानकारी नभएको हुन सक्ने भरतपुर महानगरपालिका शैक्षिक महाशाखा प्रमुख पौडेलले जानकारी दिए ।

यस वर्ष छनोट भएकाले बर्सेनि नियमित क्याम्पसमा अध्ययन गरी रहेको कागजात बुझाएर छात्रवृत्ति नवीकरण गर्नुपर्ने प्रमुख पौडेलले जानकारी दिए । महानगरले आगामी वर्ष ५० जनालाई छात्रवृत्ति दिने गरी कार्यविधि संशोधन गर्ने पनि जनाएको छ ।