चितवन – नारायणी नदी किनारमा नेपालकै पहिलो फोटो पार्क सन्चालनमा आएको छ । डिएसएलआर सेवाले नवलपुरको गैंडाकोट नगरपालिका २ स्थित नारायणी किनारमा आज (आइतबार) बाट पार्क सन्चालनमा ल्याएको हो ।
प्रणय दिवसको अवसर पारेर सन्चालनमा आएको फोटो पार्कको गैंडाकोट २ का वडाध्यक्ष धुर्वराम पौडेलले उद्घाटन गरे । उक्त फोटो पार्कको उद्घाटन गर्दै वडाध्यक्ष पौडेलले स्थानीयले फोहोर फाल्ने ठाउँलाई युवाहरुले नयाँ र नौलो रुप दिएको बताए ।
फोटो पार्कको रुपमा युवाहरुले नौलो सुरुवात गरेर सकारात्मक सन्देश दिएको उनले बताए । “यहाँ सबैले फोहोर फाल्ने गर्थे, यो ठाउँमा फोहोरले अस्तव्यस्त थियो उनले भने, यस्तो ठाउँमा युवाहरुले नयाँ र नौलो किसिमको व्यवसाय शुरु गरेका छन् । यसले समाजमा सकारात्मक सन्देश जान्छ ।”
उनले वातावरणीय प्रदुषणलाई मध्यनजर गर्दै आगामी दिनमा पनि स्थानीय टोल सुधारसँग समन्वय गरेर फोहोर व्यवस्थापन गर्न आग्रह गरे । उनले अहिले पर्यटकहरु फोटो खिच्न रुचाउने हुँदा फोटो पार्कको सेवा प्रभावकारी हुने विश्वास व्यक्त गरे । यस्तै उनले अहिलेका युवा युवतीहरुमा फोटो खिच्ने आकर्षण बढ्दो रहेको भन्दै नदी किनार वरपर फोटो खिच्दा सतर्कता अपनाउन आग्रह पनि गरे । उनले कुनै पनि समस्या परे आफुहरु सहयोग र समन्वय गर्न तयार रहेको समेत बताए ।
डिएसएलआरका संचालक सन्तोष कुँवरले ३ वर्ष अघी नारायणी किनार नारायणगढबाट एउटा क्यामेराले शुरु गरेको व्यवसायलाई समयसँगै नयाँ रुपमा अघि बढाएको बताए । उनले नारायणी किनार गैंडाकोटतर्फको वातावरण रमणीय भएकोले पार्क बनाएर नयाँ सोचका साथ फोटो व्यवसाय शुरु गरिएको बताए । “३ वर्ष अगाडि एउटा क्यामेराले हामीले नारायणी किनार नारायणगढबाट व्यवसाय शुरु गरेका थियौं उनले भने, अहिले त्यँहा धेरै साथीहरुले काम गरिरहनु भएको छ, हामीले नयाँ सोचका साथ यहाँ व्यवसाय शुरु गरेका छौं ।”
अर्का संचालक सन्देश कुँवरले पार्क निर्माणका लागि मात्रै ६ लाख लगानी लागिसकेको बताए । फोटो पार्क उनकै परिकल्पना हो । फोटो खिच्ने व्यवसायका लागि नारायणी किनार गैंडाकोटतर्फको बातावरण उपयुक्त भएकोले पार्क निर्माण गरेर व्यवसाय अघि बढाइको उनले बताए ।
आफ्नै देशमा केही गरौं र पसिनामा आफ्नै माटोमा बगाऔं भन्ने सोचका साथ फरक तरिकाले व्यवसाय अघि बढाइएको उनको भनाइ छ । उनले पार्कमा थप संरचना निर्माणको क्रममा रहेको बताए ।
फोटो पार्कमा ५ देखि ७ जनाले रोजगार पाउने समेत उनले बताए । आन्तरिक तथा बाह्य पर्यटक भित्र्याउने लक्ष्यसहित फोटो पार्क सन्चालनमा ल्याइको कुँवरल बताए । उनले फोफोर व्यवस्थापनका लागि आफुहरु सधैं तयार रहने भन्दै बातावरणीय प्रदुषणमा असर पुग्न नदिने समेत बताए ।
फोटोपार्क भित्र फोटो खिच्नका लागि आकर्षक आकर्षक फोटो फ्रेमहरु बनाइको छ । फोटो पार्कलाई सुन्दर तरिकाले सजाइएको छ । फोटोपार्क भित्र फोटो खिच्दा प्रति फोटो २५ रुपैयाँ शुल्क लाग्नेछ । डिएसएलआरले पहिलो पटक नारायणी किनार नारायणगढमा फोटो खिच्ने व्यवसाय शुरु गरेको छ । त्यसैलाई पछ्याउदै अहिले जिल्लाका बिभिन्न पर्यटकीय स्थलहरुमा फोटोग्राफरहरुले उक्त व्यवसाय सन्चालन गरिरहेका छन् ।
