चितवन – चितवन प्रहरीले मोडिफाइ गरिएका र चर्को आवाज निकाल्ने मोटरसाइकललाई कारबाही सुरु गरेको छ । प्रहरीले शुक्रबार एकै दिन मोडिफाइ गरिएका र चर्को आवाज निकाल्ने ३४ वटा मोटरसाइकल नियन्त्रणमा लिएको छ ।

जिल्ला प्रहरी कार्यालय चितवनले ३१ र ईलाका प्रहरी कार्यालय रत्ननगर टाँडीले ३ गरी एकै दिन ३४ वटा मोटरसाइकल नियन्त्रणमा लिइएको हो । जिल्लाका बिभिन्न १५ स्थानबाट ति बाइकहरु नियन्त्रणमा लिइएको चितवनका प्रहरी प्रमुख एसपी ओमप्रसाद अधिकारीले जानकारी दिए।

शनिबार अप्रेसन नै चलाएर ति मोटरसाइकलहरु नियन्त्रणमा लिइएको उनले बताए । फ्याक्ट्रीबाट उत्पादन हुँदाको स्वरुप परिवर्तन गरेर ठुलो आवाज आउने बनाउदा ध्वनी प्रदुषणसँगै समाजमा अराजकता फैलिने भएकोले कारबाही सुरु गरिएको उनको भनाइ छ । यातायात व्यवस्था एनमा नै मोडिफाइ गर्नु नियम विपरित भनी उल्लेख छ ।

मोटरसाइकलको साइलेन्सरमा रेडबुलको डिब्बा हालेर ठुलो आवाज आउने बनाउने, मोडिफाइ गर्ने कार्य कानुन विपरित भएकोले कारबाही सुरु गरिएको एसपी अधिकारीले बताए । त्यस्ता गतिविधिले समाजमा नै असर गर्ने उनको भनाइ छ । नियन्त्रणमा लिइएको सबै मोटरसाइकललाई ५-५ हजार रुपैयाँ जरिवाना हुनेछ ।

यस्तै मोडिफाइ गरिएका मोटरसाइकललाई पुरानै अवस्थाको बनाएर बल्ला छाडिने छ । चालकलाई दुई घण्टा ट्राफिक नियम सम्बन्धी कक्षा समेत दिइने छ । यस्तै मोटरसाइकल मोडिफाइ गर्ने वर्कसपलाई पनि बोलाएर पहिलो चरणमा ट्राफिक नियम बारे प्रशिक्षण दिने उनले बताए। प्रशिक्षणपछि पनि अटेर गरे वर्ससपलाई पनि कारबाहीको दायरामा ल्याइने प्रहरीले जनाएको छ ।

केही दिन अघि मात्रै जिल्ला ट्राफिक प्रहरी कार्यालय चितवनले पनि मोडिफाइ गरिएका र चर्को आवाज निकाल्ने २० वटा मोटरसाइकल नियन्त्रणमा लिएको थियो । ति सबै मोटरसाइकललाई ५-५ हजार रुपैयाँ जरिवाना र २ घण्टा कक्षा दिएर छाडिएको चितवनका ट्राफिक प्रमुख दयाकृष्ण भट्टले बताए ।