कर्णाली स्वास्थ्य विज्ञान प्रतिष्ठान जुम्लामा डाक्टर कुट्ने एक जना कर्मचारी निलम्बित भएका छन् ।

बिहीबार बिहान प्रतिष्ठानमा कार्यरत कर्मचारी धनराज शाहीले प्रतिष्ठानका डाक्टर करण शाहलाई इमर्जेन्सी विभागमा आफ्नो छोराको घाउको टाँका काट्न ढिलाइ गरेको भन्दै कुटेका थिए ।

ड्युटीमै बसेका डाक्टरलाई प्रतिष्ठानकै कर्मचारीले कुटेपछि डाक्टरहरू सुरक्षाको माग गर्दै आन्दोलनमा उत्रेका थिए । डाक्टरहरू कामकाज नगरी आन्दोलनमा उत्रिएपछि प्रतिष्ठानले तत्काल एक्सन लिएको छ ।

शनिबार प्रतिष्ठानमा बसेको कार्यकारी परिषदको बैठकले निर्देशक डा. पुजन कुमार रोकायाको संयोजकत्वमा तीन सदस्यीय छानबिन समिति गठन गरेको प्रतिष्ठानका रजिष्ट्रार नृपेन्द्र महतले जानकारी गराए ।
उनका अनुसार डाक्टर कुट्ने कर्मचारीलाई ४५ दिनका लागि निलम्बन गरिएको छ ।

छानबिन समितिमा डा. पुजन कुमार रोकाया संयोजक, डा. अनुपमंगल समाल र प्रतिष्ठान कानुनी सल्लाहकार मीनबहादुर महत सदस्य रहेका छन् । महतले भने, ‘समितिले ३० दिनभित्र घटनाको   प्रतिवेदन प्रतिष्ठानमा बुझाउने छ ।’