भरतपुर अस्पतालको फार्मेसीमा खुद्रा बिक्री मूल्य (एमआरपि) को ५० प्रतिशतसम्म यस्तोमा औषधि बिक्री गर्दा समेत गत आर्थिक वर्षमा आठ करोड रुपैयाँ नाफा भएको छ । अस्पतालले गत आर्थिक वर्षमा ८ करोड रुपैयाँको औषधि खरिद गरी १६ करोड रुपैयाँमा बिक्री गरेको हो ।
अस्पतालका सूचना अधिकारी गोपाल पौडेलका अनुसार गत आर्थिक वर्षमा ८ करोड १ लाख २० हजार ४७४.७३ को औषधि खरिद गरेको थियो । ती औषधि १६ करोड ९३ लाख २४ हजार ८१.३१ रुपैयाँमा बिक्री गरेको छ । उक्त बिक्रीबाट ८ करोड ६७ लाख ४४ हजार ९०.९७ रुपैयाँ नाफा भएको उहाँको भनाई छ ।
अस्पतालले टेण्डर मार्फत् खरिद गरेको मूल्यमा औषधिमा लेखिएको एमआरपि (बिक्री मूल्य) जोडेर दुईले भाग गरी आउने मूल्यमा औषधि बिक्री गर्दै आएको छ । यसबाट सरदर ४० प्रतिशत सस्तोमा उपभोक्ताले औषधि पाएको अस्पतालले जनाएको छ । अस्पतालका अनुसार यसरी बिक्री गर्दा अधिकतम ५० प्रतिशत र न्यूनतम १० प्रतिशतसम्म उपभोक्ताले सस्तो मूल्यमा औषधि पाएका छन् । उदाहरणका लागि अस्पताले टेण्डर मार्फत् ग्यास्टिक हुँदा प्रयोग गर्ने पेन्टाप्राजोल प्रतिगोटा १ रुपैयाँ ५ पैसामा खरिद गर्ने गरेको छ । त्यसको बिक्री मूल्य रु.८ रहेको छ । खरिद मूल्यमा खुद्रा मूल्य जोडेर दुईले भाग गर्दा उक्त औषधि प्रति गोटा ४ रुपैयाँ ७५ पैसा पर्ने गर्दछ ।
बोलपत्र मार्फत् खरिद गर्दा अन्य औषधिहरु पनि ठेकेदार कम्पनीले न्यूनतम मूल्य राखेर अस्पताललाई दिने गरेको सूचना अधिकारी पौडेलले कान्तिपुर हेल्थलाई बताउनुभयो । औषधिपिच्छे फरक फरक टेण्डर लगाउने हुँदा सबै औषधि लेखिएको बिक्री मूल्य भन्दा निकै सस्तो मूल्यमा अस्पतालले खरिद गरेको छ ।
अस्पतालले आर्थिक वर्ष ०७७/०७८ मा ११ करोड १४ लाख २२ हजार १३.३ रुपैयाँको औषधि बिक्री गरी ३ करोड ७७ लाख ५५ हजार ४८.६८ नाफा आर्जन गरेको थियो । यस्तै आर्थिक वर्ष ०७६/०७७ मा १४ करोड ६५ लाख ५७ हजार ६८४.१४ को औषधि बिक्री गरी ३ करोड ९३ लाख ३४ हजार ४२४.४७ रुपैयाँ नाफा आर्जुन गरेको थियो ।
आर्थिक वर्ष ०७५/०७६ मा १४ करोड ४५ लाख ८९ हजार ३०.६० रुपैयाँ औषधि बिक्री गरी ४ करोड २० लाख ६ हजार २२३.०४ रुपैयाँ नाफा आर्जुन गरेको थियो ।
अस्पतालमा हाल ८५० प्रकारका औषधि बिक्री हुँदै आएका छन् । बीमाले १ हजार १ सय प्रकारका औषधि दिने व्यवस्था गरेको छ । सबै औषधि पु¥याउनका लागि विभिन्न बाधा व्यवधान रहेको अस्पतालले जनाएको छ । सार्वजनिक खरिद ऐनको पालना गर्नुपर्दा र ठेकेदार कम्पनीहरुले बोलकबोल गरेर पनि समयमै औषधि नल्याईदिंदा पूर्ण रुपमा सफल हुन कठिन भएको जनाईएको छ ।
अस्पतालमा हाल तीन वटा औषधि बिक्री कक्ष रहेका छन् । अस्पताल प्राङ्गणमा मुख्य औषधि बिक्री कक्ष रहेको छ भने शल्यक्रिया कक्ष र बहिरंग कक्षमा पनि औषधि बिक्री कक्ष राखिएको छ । अस्पतालले हाल फार्मेसीबाट अपाङ्गता भएका बिरामीहरुलाई सेवा सहजताको लागि छुट्टै काउण्टरको व्यवस्था गरेको छ ।
औषधि खरिदका लागि लामो समय लाईनमा बस्नु पर्ने समस्यालाई ध्यानमा राखी विद्युतीय टोकनको व्यवस्था गरिएको छ भने बस्नका लागि कुर्चीहरुको व्यवस्था रहेको अस्पतालले जनाएको छ । औषधिको खरिद, भण्डारण एवं व्यवस्थापनका कार्यहरु अस्पतालको फार्मेसी शाखाले गर्दै आएको छ ।
समाचार : कान्तिपुर हेल्थ
