काठमाडौँ, भदौ १८ : ठगी आरोपमा फरार एक अभियुक्त संयुक्त अरब इमिरेट्स (दुबई)बाट त्रिभुवन अन्तर्राष्ट्रिय विमानस्थल अवतरण गरी भीआईपी कक्षबाटै भागेका छन् । ठगीको कसुरमा प्रहरीको फरार सूची एवं अध्यागमनको कालोसूचीमा परेका सुनसरीका ३० वर्षीय रिजवान आलम शुक्रबार भीआईपी कक्षबाट भागेका हुन् । मुस्लिम आयोगका अध्यक्ष समिम मियाँ अन्सारी उनीसँगै भीआईपी कक्षमा छिरेका थिए, दुबईबाट फर्किएका रिजवान आलम ।
उनी मुस्लिम आयोगका अध्यक्ष समिम मियाँ अन्सारीसँगै दुबईबाट आएका थिए । अन्सारीले भीआईपी कक्ष प्रयोग गरे । उनीसँगै आएका आलम पनि भीआईपी कक्षतर्फ लागे । तर, आलमको राहदानी कालोसूचीमा परेको भेटिएपछि अध्यागमनले प्रहरीलाई खबर गर्यो । सुरक्षाकर्मीले नियन्त्रण लिन नपाउँदै भीआईपी कक्षको ढोकाबाटै भागेर उनी सम्पर्कविहीन भएका हुन् ।
अन्सारीसँगै राहदानी जाँच नगराई आलम भीआईपी कक्षमा प्रवेश गरेका थिए । विमानस्थलका प्रमुख अध्यागमन अधिकृत पुष्पराज शाहीले आलम भीआईपी कक्षबाट भागेर सम्पर्कविहीन भएको पुष्टि गरे । ‘अध्यागमन कक्षमा अन्सारीसँगै आएका रिजवान आलमको रेकर्ड हेर्दा कालोसूचीमा परेको भेटिएपछि हामी उनको खोजीमा जुट्यौं तर त्यसअगावै उनी भीआईपी कक्षबाट भागे, उनको खोजी भइरहेको छ,’ उनले भने ।
आलमको खोजी गर्न त्रिभुवन अन्तर्राष्ट्रिय विमानस्थल अध्यागमन कार्यालयले काठमाडौं उपत्यका अपराध अनुसन्धान कार्यालयलाई पत्राचार गरेको छ । आलमसहित तीन जनाविरुद्ध दाउद हुसेनले गत कात्तिकमा आलमविरुद्ध १ करोड ६८ लाख रुपैयाँ ठगी गरेको कसुरमा कारबाहीका लागि प्रहरीमा जाहेरी दिएका थिए ।
