निर्वाचन आयोगले आगामी मंसिर ४ गते हुने चुनावका लागि देशभर १० हजार ८ सय ८८ मतदानस्थल निर्धारण गरेको छ। यसअघि देशभर १० हजार ७५६ मतदानस्थल रहेका थिए।
आयोगले मतदान व्यवस्थापनलाई प्रभावकारी बनाउन तथा मतदातालाई मतदानमा सहज पहुँचका लागि मतदाताको संख्या, सुविधा र सुरक्षालाई मद्देनजर गरी केही मतदानस्थल पुनरावलोकन गरेको जनाएको छ। पुनरावलोकन गर्दा देशभरका ४०१ मतदानस्थललाई हटाएर नयाँ मतदानस्थल निर्धारण गरेको आयोगले जनाएको छ।
पुनरावलोकन गरी १ हजार १२३ मतदानस्थलको त्रुटि सच्याएको, साविकका ३ सय ६५ मतदानस्थलबाट सबै मतदाता स्थानान्तरण गरी ३ सय ६४ मतदानस्थल निर्धारण गरेको र १६३ मतदानस्थलबाट आंशिक मतदाता सारेर १६९ मतदानस्थल निर्धारण गरेको आयोगले जनाएको छ।
अन्य १५ मतदानस्थलका आंशिक मतदातालाई स्थानान्तरण गरी १३ वटा मतदानस्थलमा गाभेको छ। मतदान केन्द्रको संख्या भने अन्तिम मतदाता नामावली प्रकाशन भएपछि मात्रै निर्धारण गरिने आयोगका सहायक प्रवक्ता सूर्यप्रसाद अर्यालले जानकारी दिए।
अर्यालले यसबारे जानकारी दिँदै भने‚ ‘सरदर १ हजार मतदाताले मतदान गर्ने गरी एउटा मतदान केन्द्र निर्धारण गरिएको हुन्छ। एउटा वडामा जतिजना मतदाता भए पनि जस्तो कि डेढ सयजना मतदाता भए पनि केन्द्र राख्नुपर्छ।’
अन्तिम मतदाता नामावली तयार भएपछि मात्रै वडाका मतदाताको संख्या टुंगो लाग्ने पनि उनले बताए।
‘पहिले २ वटा केन्द्र तोकिएको ठाउँमा अहिले २ हजारभन्दा बढी मतदाता भए भने त्यहाँ तीनवटा केन्द्र बनाउनुपर्ने हुनसक्छ‚’ उनले भने‚ ‘त्यसैले अन्तिम मतदाता नामावली तयार भएपछि केन्द्रको संख्या आउँछ‚ मतदान गर्ने ठाउँ कहाँ हो भन्ने टुंगो लाग्छ।’
