दाङ, भदौ २५ : सुनका गरगहना तथा नगद चोरीको आरोपीलाई अनुसन्धानका लागि म्याद थप गर्न जिल्ला अदालत लगेका बेला अदालतको दुई तला माथिबाट हाम फालेर भागेका व्यक्तिलाई प्रहरीले पुनः पक्राउ गरेको छ । अदालतबाटै फरार भएका व्यक्तिलाई प्रहरीले २४ घण्टाभित्र पक्राउ गरेको हो ।
घोराही उपमहानगरपालिका–१० नारायणपुरको एक घरमा चोरी गरेको अभियोगमा पक्राउ परेका घोराही–१७ का २२ वर्षीय लक्ष्मण विश्वकर्मा बिहीबार पाँच बजेतिर जिल्ला अदालत दाङको दुई तलामाथिबाट हाम फालेर भागेका थिए।
आरोपीलाई घोराही–लमही सडक खण्डको एक घरबाट शुक्रबार राति पक्राउ गरिएको जिल्ला प्रहरी कार्यालय दाङका प्रमुख प्रहरी उपरीक्षक बीरबहादुर वलीले जानकारी दिए । अदालतमा म्याद थप लगेका बेला विश्वकर्मा शौचालयबाट भागेको उनले बताए ।
