चितवन, भदौ २८ । चितवनमा मनिट्रान्सफर डाँका गरेर पैसा लुटेको आरोपमा एक जना प्रक्राउ परेका छन् । भरतपुर महानगरपालिका ४ फनपार्क नजिक सञ्चालन रहेको नारायणी मनिट्रान्सफरका कर्मचारीलाई धारिलो हतियार देखाएर पैसा लुटेको आरोपमा नवलपरासी (बर्दघाट पुर्व)का मिनमान सुनार पक्राऊ परेका हुन् । हिजो (सोमवार) चौविसकोठिबाट पकाउ परेका उनलाई जिल्ला प्रहरी कार्यालय चितवनले आज (मंगलवार) पत्रकार सम्मेलन गरि सार्वजनिक गरेको हो ।
साथै उनले प्रयोग गरेको बा.प्र.०३–००१ ह १२६३ नम्बरको अटो, २ थान धारिलो हतियार सहित १ लाख ६७ हजार रुपैयाँ समेत प्रहरीले बरामद गरेको छ । सुनारले भदौ २६ गते दिउँसै ट्रान्सफरमा कार्यरत कर्मचारीलाई धारिलो हतियार देखाएर २ लाख ४ हजार २५० रुपैयाँ लुटेको जिल्ला प्रहरी कार्यालय चितवनका प्रमुख नवराज अधिकारीले जानकारी दिए । उनलाई हिरासतमा डाँका चोरी कसुरमा थप अनुसन्धान गरिरहेको अधिकारीले बताए ।
यसैबिच जिल्ला प्रहरी कार्यालय चितवनले हराएका २६ थान मोवाईल फेला पारेको छ । काठमाण्डौँ, पार्स, नवलपरासी, कास्की लगायतका जिल्लामा चलाईरहेको अवस्थामा हराएका २६ थान मोवाईल फेला पारी सम्बन्धित धनिलाई बुझाएको उनले बताए । उनका अनुसार, १४ हजार रुपैयाँदेखि १ लाख २५ हजार रुपैयाँसम्म पर्ने मोवाईल फेला परेका हुन् ।
चितवनमा चाडपर्व विशेष सुरक्षा योजना बनाईएको छ । जिल्ला प्रहरी कार्यालय चितवनले दशँैतिहार लक्षित चाडपर्वलाई लक्षित गर्दै विशेष सुरक्षा योजना बनाएको हो । विशेष गरि राजमार्गमा हुन सक्ने लुटपाट, डकैती, सवारी दुर्घटना र समाजचमा हुन सक्ने चोरी लुटपाट मादक पदार्थ सेवन तथा गुडागर्दी जस्ता अपराधिक गतिविधिलाई नियन्त्रण गर्न प्रहरीले चाडपर्व लक्षित विशेष सुरक्षा योजना बनाएको छ । सवारी साधनको अत्याधिक चाप बढ्ने र मापसे गरि सवारी साधन चलाई दुर्घटना बढी हुन सक्ने भएकाले प्रहरीले विशेष योजना बनाएको छ । यसका लागि राजर्मागका सवारी साधनभित्रै प्रहरी परिचालन गरिने उनले बताए ।
सार्वजनिक यातायातको भाडाको अनुगमन गर्ने प्रहरीले जनाएको छ । यसपटकको चाडपर्वमा राजनितीक क्रियाकलापहरु हुन सक्ने भएकाले सादा पोसाकमा प्रहरी परिचालन गरेर सुरक्षा व्यवस्था मिलाईएको प्रहरी उपरिक्षक अधिकारीले बताए । बैंक तथा वित्तिय संस्था लुटपाट हुनसक्ने भएकाले त्यसतर्फ पनि सुरक्षा योजना बनाएको उनले बताए ।
