करिब एक महिना पहिले आफ्नो सांगीतिक प्रस्तुति दिन जापान पुगेकी लोक तथा दोहोरी गायिका अमृता श्रीपालमाथि यौन दुर्व्यवहार भएको घटना बाहिरिएको छ । गायिकालाई स्पोन्सर गरी जापान लैजाने ओसाका कोबेस्थित धौलागिरि दोहोरी साँझका सञ्चालक धन थापाले हातपात, यौन दुर्व्यवहार एवं ज्यान मार्ने धम्की दिएको घटना बाहिरिएको हो ।
आफ्नो जिउ ज्यानको रक्षा र न्यायका लागि म्याग्दी प्रवासी नेपाली संघ (मोना) जापान र राष्ट्रिय लोक तथा दोहोरी गीत प्रतिष्ठान जापान शाखासमक्ष निवेदन दिइसकेको गायिकाले मध्यान्हसँगको कुराकानीमा बताइन् । उनले आफूलाई अति पीडा दिएको हुँदा पीडा दिने भन्दा सहने झन् अपराधी हुन सक्ने महसुस गर्दै आफ्नो अस्तित्व रक्षाका लागि आफूले आवाज उठाएको बताइन् । नेपाल हुन्जेल बहिनी भनेर अति नै माया देखाएका थापाले जापान आएको केही समयदेखि नै दुर्व्यवहार प्रयास गर्दै नैतिक, भौतिक र शारीरिकरूपमा यातना दिने गरेको बताइन् ।
थापाले आफूलाई जापानमा र नेपाल (म्याग्दी) मा रहेको परिवारलाई समेत मार्ने धम्की दिने गरेको हुँदा आफूलाई मानसिक पीडा, सामाजिक इज्जत, सांगीतिक करियरमा असर पर्नका साथै चरित्र हत्याको पीडाले अति धेरै पीडित बनेको निवेदनमा उल्लेख गरेकी छिन् । निवेदनमा जनाए अनुसार आफ्नो स्वार्थ पूरा नहुँदा ११ सेप्टेम्बरमा पनि भौतिकरूपमा थापाले आक्रमण गरेपछि आफ्नो ज्यान बचाउँदै ओसकामा एक घरमा शरण लिई लुकीछिपी बसी रहेको हुँदा आफूलाई न्याय दिलाई दिन र जिउ ज्यानको सुरक्षा ग्यारेन्टी गरिदिनका लागि अपिल गरेकी छिन् ।
श्रीपालले निवेदन दिएको पुष्टि गर्दै मोना जापानले एक प्रेस विज्ञप्ति जारी गर्दै ‘निज थापाको उक्त घृणित एवं निन्दनीय कार्यको घोर भत्र्सना गरेको छ । विज्ञप्तिमा भनिएको छ, ‘दोहोरी साँझको नाममा नेपालबाट कलाकार बोलाएर यस्ता हर्कत विगतमा पनि गर्दै आएको बुझिएकोले निजको नियतमै खोट रहेको घटनाक्रमहरूबाट प्रस्ट हुन्छ । सामाजिक एवं न्यायिक सुरक्षाको ग्यारेन्टी भएको देश जापानमा बस्दै गर्दा त्यो हदको ज्यादतीको जति नै निन्दा गरे पनि थोरै हुने व्यहोरा स्पष्ट पार्न चाहन्छौं । एक पटक होइन पटक–पटक ज्यान मार्ने धम्की दिने निज थापाबाट ज्यान जोगाउन पीडित गायिका श्रीपाल भागेर हाल आफन्तको शरणमा बसिरहेको अवस्था छ । भविष्यमा पनि यस्तै ज्यादतीपूर्ण अमानवीय व्यवहार कसैमाथि नदोहोरियोस् भन्ने उद्देश्यले सम्बन्धित सबैलाई सचेत गराउन चाहन्छौं ।’
यता प्रतिष्ठान जापान शाखाले निवेदन प्राप्त भएको पुष्टि गर्दै विभिन्न सञ्चारमाध्यमबाट आएको समाचार र संघ संस्थाले जारी गरेको विज्ञप्ति जस्तै प्रतिष्ठान जापान शाखामा निवेदन परेकै दिनदेखि सत्य तथ्य पत्ता लगाउन दुबै पक्षसँग निरन्तर छलफल गरिरहेको जानकारी गराएको छ ।
गायिका श्रीपालले आरोप लगाएका धन थापाले भने यो विषयलाई खण्डन गरेका छन् । उनले बुधवार राष्ट्रिय लोक दोहोरी गीत प्रतिष्ठानमा निवेदन दिँदै गायिका श्रीपाल लगायत कलाकारलाई आफूले धौलागिरि दोहोरी साँझमा कार्यक्रमका लागि ल्याएको, तर सम्झौता विपरीत अन्य क्लब र दोहोरी साँझमा समेत गाउँदै हिँडेकाले सामान्यरूपमा सम्झाएको बताएका छन् ।
#मध्यान्नडेलीको लागि तिलु शर्माले तयार पारेको समचार ।
