भरतपुर महानगरले बजार अनुगमनलाई तिव्रता दिएको छ । महानगरका सबै संयन्त्र परिचालन गरेर बजार अनुगमनलाई तिव्रता दिईएको हो ।
महानगरको उपभोक्ता हित संरक्षण शाखा तथा शासकीय सुधार इकाइ अधिकृत ठानेश्वर सापकोटाले खाद्यान्न, औषधि र सेवाकाे मूल्यमा गरिएको मूल्य वृद्धि घटाउन र उपभोक्तालाई राहत दिनका लागी भदौ महिना देखि बजार अनुगमनमा सक्रियताका साथ लागेको बताए । कालोबजारी नियन्त्रण गर्नु, मिसावट भएको बस्तुहरुको बिक्रीवितरणमा रोक लगाउन, महङ्गी नियन्त्रण, बिना दर्ता व्यवसाय सञ्चालनमा रोक तथा अनिवार्य मूल्य सुचीलाई कडाईका साथ पालना गराउन अनुगम भइरहेको उनले बताए ।
महानगरले आज (बुधबार) भरतपुर २९ जुगेडि बजारमा अनुगमन गरेको छ । सो क्रममा वडा न २९ का अध्यक्ष सूर्यबहादुर गुरुङले निरन्तर बजार अनुगमन गर्न जरुरी रहेको बताए । बजार अनुगमनलाई अब निरन्तर रुपमा अगाडि बढाउने पनि उनले प्रतिवद्धता जनाए । जुगेडी बजारमा रहेका १५ वटा विभिन्न पसलहरुमा अनुगमन गरिएको हो ।
होटल हाइवे तन्दुरी कर्नर,ए लिना होटल, न्यु बुटवल होटलमा अनुगमन गर्दा सामान्य भेटिएको छ । त्यस्तै न्यौपाने खाजा घरमा रहेको म्याद नाघेका खाद्य सामाग्री बरामद गरि नष्ट गरिएको छ । होटल नमस्ते नेपालमा रहेका १५ वटा क्यान बियर बरामद गरि नष्ट समेत गरिएको वडा सदस्य सेतु गुरुङले बताए ।
अनुगमनकै क्रममा पण्डित स्टाफ होटलमा ५० जनालाइ पुग्ने बासी खाना तथा ३० वटा क्यान बियर पनि बरामद गरि वडा सदस्यहरुको रोहबरमा नष्ट गरिएको छ । होटल व्यवसायी संघ चितवनकी उपाध्यक्ष कमला गुरुङ समय समयमा चेतनामूलक कार्यक्रम गर्न जरुरी रहेको तर्क गर्छिन । कालोबजारी र मिसावट गर्नेलाई कुनै पनि शर्तमा नछाड्ने भरतपुर महानगर राजस्व शाखाका अधिकृत चन्द्रकला शर्माले बताईन्।
जनताको आँखामा छारो हालेर स्वास्थ्यसँग खेलवाड हुने गरी गुणस्तरहीन अखाद्य वस्तु बिक्री गर्ने व्यापारिक प्रतिष्ठान र उद्योगीलाई कारबाही गर्ने पनि महानगरले चेतावनी समेत दिदै आइरहेको छ ।
आमनागरिकको स्वास्थ्यसँग प्रत्यक्ष खेलवाड गर्ने गरी गुणस्तरहीन अखाद्य वस्तु उत्पादन तथा बिक्री गर्नेलाई कारबाही थालिएको उपभोक्ता अधिकार संरक्षण मञ्च चितवनका उपाध्यक्ष बिस्णु भुसालले भने ।
