स्थानीय तहको चुनावमा भरतपुर महानगरको मेयर पदका उम्मेदवार जगन्नाथ पौडेलले चितवन क्षेत्र नम्बर ३ बाट उम्मेदवारी दिनुहुने भएको छ । गठबन्धन विरुद्ध उम्मेदवारी दिएको भन्दै साधरण सदस्य समेत नरहने गरि कांग्रेसले कारवाही गरेका पूर्वसांसद पौडेल फेरी स्वतन्त्र उम्मेदवार बन्ने हुनुभएको हो ।
“म चितवन ३ नम्बर क्षेत्रबाट उम्मेदवारी दिदै छु”, कालिका एफएमसँग कुराकानी गर्दै उहाँले भन्नुभयो, “प्रचण्डलाई जिताउन पार्टीले कारवाही गरेपनि अब जनताबाट अनुमोदित भएर सांसद बन्नेछु ।” उहाँले स्थानीय तहको चुनावमा भरतपुर महानगरमा भूईकटहर चुनाव चिन्हमा परेको मतले चितवनमा गठबन्धन आवश्यक नभएको पुष्टी गरेपनि केन्द्रीय नेतृत्वले पार्टीको अस्तित्वनै मेट्न खोजेको जीकिर गर्नुभयो । “कांग्रेसले मलाई कारवाही ग¥यो, तर म त्यही पार्टी बचाउन उम्मेदवार बन्दैछु”, उहाँले भन्नुभयो, “हामी गठबन्धन होइन, कांग्रेस बाँच्नुपर्छ भन्नेमा छौँ ।”
कांग्रेसबाट विद्रोह गरेर स्वतन्त्र उम्मेदवार बन्नुभएका पौडेलले बैशाखको चुनावमा भरतपुर महानगरको मेयर पदमा १४ हजार ७ सय २८ मत ल्याउनुभएको थियो । “स्थानीय तहमा हामी १० दिनमात्रै चुनावी अभियानमा थियौँ, अहिले हामी जनताका घरदैलोमा गैरहेका छौँ”, उहाँले भन्नुभयो, “मेरो उम्मेदवारी रहन्छ, पार्टीले कारवाही फुकुवा गरेर पार्टीको साझा उम्मेदवार बनाएपनि तयार हुनेछु ।” चितवन क्षेत्र नम्बर ३ मा गठबन्धनबाट माओवादी अध्यक्ष तथा पूर्वप्रधानमन्त्री पुष्पकमल दाहाल प्रचण्ड उम्मेदवार बन्ने चर्चा भएपनि गोर्खा–२ मा उम्मेदवार बन्ने चर्चा हुन थालेको छ ।
स्थानीय तह चुनावमा भूईकटहर चुनाव चिन्हको पक्षमा लागेका एक नेताले प्रचण्डलाई चितवनबाट उम्मेदवार नहुने वातावरण सृजना गरेकाले भूईकटहर समूहकै उम्मेदवारलाई कांग्रेसले साझा उम्मेदवार बनाउनुपर्ने जीकिर गर्नुहुन्छ । “हाम्रो योगदान गर्दै हाम्रा उम्मेदवारलाई सघाउन कांग्रेस तयार हुनुपर्छ”, उहाँले भन्नुभयो, “प्रचण्ड चितवनमा उम्मेदवार नभए कांग्रेसबाट अर्को व्यक्ति उम्मेदवार बनेपनि हाम्रो समूहको उम्मेदवारी रहन्छ ।” स्थानीय तहकै चुनावदेखि कांग्रेस शुद्धिकरण अभियान चलाइरहेको जीकिर गर्दै उहाँले कांग्रेस बचाउने नेतृत्व जनताले खोजेको दाबी गर्नुभयो ।
स्थानीय तहको चुनावमा गठबन्धनविरुद्ध लागेको भन्दै मेयर पदका उम्मेदवार तथा पूर्वसांसद जगन्नाथ पौडेल, पूर्वसांसद भीमबहादुर श्रेष्ठ, महासमिति सदस्य तथा महिला अधिकारकर्मी मीना खरेल, तरुण दलका पूर्व केन्द्रीय सदस्य तथा चितवनका संस्थापक अध्यक्ष शम्भुप्रसाद अर्याल, तरुण दलका पूर्व जिल्ला सचिव आनन्दराज राउत, क्रियाशिल सदस्य तथा केशवराज पौडेल लगायतका नेताहरु निलम्वित हुनुभएको थियो ।
कारवाही फुकुवा गर्ने भनिएपनि नभएपछि कांग्रेसभित्र विद्रोही समूहका रुपमा गतिविधि हुदै आएका छन् । भदौ २४ मा पार्टी सभापति तथा प्रधानमन्त्री शेरबहादुर देउवा आएका बेला कारवाही फुकुवा गर्ने गरी भेट गराउने जिल्ला पार्टीको आश्वासन पनि पुरा नभएपछि भूईकटहर समूहले उम्मेदवारी दिने तयारी गरेको हो । “महानगरका १० वडाहरु छैनन्, तर माडीका ९ वडाहरु ३ नम्बर क्षेत्रमा छन्”, भूईकटहर समूहका ती नेताले भन्नुभयो, “हामीसँग २५ हजार मत छ, हामी जित्नेमा ढुक्क छौँ ।” कांग्रेस चितवनका पूर्व जिल्ला सभापति कृष्णलाल सापकोटाले पनि चितवन क्षेत्र नम्बर ३ मा उम्मेदवार बन्ने इच्छा देखाउनुभएको छ । कांग्रेसबाटै अन्य २–३ जना नेताहरुले पनि स्वतन्त्र उम्मेदवारी दिने तयारी गरिररहेका छन् । यो समाचार कालिका एफएमले प्रकाशन गरेको छ।
