भरतपुर, असोज १३

विश्व मुटु दिवसको अवसर पारेर नेपाल हृदयरोग निवारण प्रतिष्ठान चितवनले साइकल र्‍याली गरेको छ ।

‘एक सपना साइकल र सफा नेपालको’ अभियान समेतको संयुक्त आयोजनामा ‘मन लगाउ, मुटु बचाउन’ भन्ने नाराका साथ मंगलबार सचेतनामूलक साइकल र्‍याली सम्पन्न गरिएको हो ।

बिहान नारायणघाट बसपार्कबाट सुरु भएको र्‍याली दियालो रोड, मेनरोड, पुलचोक, शहिदचोक, बस टर्मिनल चोक, बाइपास रोड, आपटारी हुँदै पुनः नारायणघाट बसपार्कमा पुगेर समापन गरिएको हो ।

र्‍यालीमा ७८ जना साइकल राइडरसँगै करिब ९० जनाले सहभागिता जनाएका थिए । औपचारिक कार्यक्रममा नेपाल हृदयरोग प्रतिष्ठानका जिल्ला सभापति नारायणसिंह कुँवर, केन्द्रीय सदस्य एवम् वाग्मती प्रदेश संयोजक भोजराज कौडेल, प्रदेश सचिव लिलाराज खरेल तथा एक सपना साइकल र सफा नेपालकी अभियन्ता रूक्मिणी सापकोटा घिमिरेले साइकलको प्रयोग गर्न र मुटुलाई स्वस्थ राख्नका लागि मन लगाउन आग्रह गर्नु भयो ।

साइकल र्‍यालीमा नेपाल हृदयरोग प्रतिष्ठानका जिल्ला उपाध्यक्ष अशोक अधिकारी तथा रेशमलाल श्रेष्ठ, सहसचिव कृष्ण तिवारी तथा सदस्यहरू गोविन्द पाण्डे र कमल श्रेष्ठको पनि उपस्थिति रहेको थियो । र्‍यालीका सहभागीलाई एक सपना साइकल र सफा नेपाल अभियान तथा नेपाल हृदयरोग प्रतिष्ठानले ‘मुटु बचाउ’ भन्ने नारा अंकित टि–सर्ट निःशूल्क उपलब्ध गराएको थियो भने नारायणगढ बसपार्क टोल सुधार समिति तथा सुमन मिनरल वाटरले खाजा तथा पिउने पानीको व्यवस्था गरेका थिए । हरेक वर्ष सेप्टेम्बर २९ तारिखका दिन विश्वभर नै विविध सचेतनामूलक कार्यक्रमको आयोजना गरी विश्व मुटु दिवस मनाउने गरिन्छ ।