निर्वाचन आयोगले आगामी ४ मंसिरमा हुने चुनावमा उम्मेदवारले गर्ने खर्चको सुक्ष्म अनुगमन गर्ने भएको छ । आयोगको आचारसंहिता अनुगमन समितिको बिहीबार बसेको बैठकले आयोगले तोकेको सीमाभित्र रही उम्मेदवारले खर्च गर्छन् कि गर्दैनन् भन्ने अनुगमन गर्ने निर्णय गरेको हो । उम्मेदवारले गर्ने खर्चको अनुगमनका लागि सहयोग गर्न आयोगले नेपाल प्रहरी र राष्ट्रिय अनुसन्धान विभागसँग सहयोग मागेको छ ।
सहयोगका लागि प्रहरी र अनुसन्धान विभागलाई आयोगले पत्र लेखेको छ । आयोगले निर्वाचन क्षेत्रको क्षेत्रफल, मतदाता, संख्यालाई आधार मानी अधिकतम ३३ लाख रुपैयाँसम्म प्रतिनिधिसभाका उम्मेदवारले खर्च गर्न पाउने सीमा तोकेको छ ।
