चितवन – पूर्वमन्त्री एवम् राप्रपाका उपाध्यक्ष विक्रम पाण्डेले राजनीति वा विकास र समृद्धि रोज्ने बेला आएको बताएका छन् । भरतपुर–१५ फुलबारीमा नेपाल राष्ट्रिय भूतपूर्व सैनिक संघले गरेको शुभकामना आदानप्रदान तथा भेटघाट कार्यक्रममा बोल्दै उनले फोस्रा चुनावी नारा भन्दा विश्वासिलो व्यक्तिलाई चुन्न आग्रह गरे ।
उनी चितवन क्षेत्र नम्बर ३ मा प्रतिनिधिसभा सदस्य पदका लागि उम्मेदवार छन् । “राजनीति चाहिने भए राजनीतिक खेलाडीलाई भोट दिए हुन्छ”, उनले भने, “विकास, समृद्धि, राष्ट्रवादी सोच भएको चाहिएमा राप्रपालाई भोट दिनुस ।” उनले यसपालीको चुनावलाई विगतका ४ वटा निर्वाचनको समिक्षा गर्दै सहि नेतृत्व छनौट गर्न आग्रह गरे । “आफ्नो मान्छे, आफ्नो पार्टी भनेर भोट नदिनुस”, उनले भने, “चुनावमा मात्रै झुल्किने नेता होइन, हार्दा–जित्दा सधै सँगै हुनेलाई सांसद बनाउनुस् ।”
उनले यसपालीको निर्वाचन संवेदनशील रहेकाले राष्ट्रलाई विदेशीको कव्जाबाट जोगाउन राष्ट्रवादी उम्मेदवारहरुलाई जिताउनुपर्ने बताए । “जनताको मन जित्ने काम गर्नेहरु लुकेर घेराउमा हिड्नैपर्दैन”, उनले भने, “चुनाव जितेपछि भागिहाल्ने, हारे पछि पनि कहिल्यै नआउनेहरुलाई नरोजौँ ।”

पाण्डे २०५६ सालदेखि लगातार चितवनबाट एकै निर्वाचन क्षेत्रमा उम्मेदवारी दिँदै आएका उनी यसपाली ५ औँ पटक उम्मेदवार बनेका हुन् । उहाँले देशहित विपरितका कामहरु हुन नदिन राप्रपा पहरेदारका रुपमा उभिने भएकाले यसपाली राप्रपाको पक्षमा मतदान गर्न आग्रह गरे । देश अभिभावकविहिन बनेकाले राष्ट्रवादीहरुलाई जिताउनुपर्नेमा जोड दिए ।