भरतपुर । मंसिर ४ मा हुने संसदीय निर्वाचनका लागि चितवन क्षेत्र नं. ३ मा प्रमुख पार्टीहरु कांग्रेस र एमालेका आफ्नै उमेदवार छैनन् ।

अघिल्लो निर्वाचनमा यही क्षेत्रबाट सांसद जितेका माओवादी अध्यक्ष पुष्पकमल दाहाल ‘प्रचण्ड’ गोरखातर्फ लागेपछि गठबन्धनबाट चिकित्सा पृष्ठभूमिका डा. भोजराज अधिकारी उमेदवार छन् भने एमालेले नेपाली कांग्रेसबाट बागी उमेदवारी दिएका दिनेश कोइरालालाई सहयोग गरेको छ ।

गठबन्धनले माओवादीका डा. अधिकारीलाई उमेदवार बनाएपछि कांग्रेसका केन्द्रीय सदस्य दिनेश कोइराला, जगन्नाथ पौडेल र तारा पौडेलले स्वतन्त्र उमेदवारी दिएका छन् ।

गठबन्धनबाट पुनः माओवादीलाई टिकट दिइएपछि कांग्रेसका दुई नेताहरु दिनेश कोइराला र जगन्नाथ पौडेल फरक–फरक चुनाव चिह्नमा स्वतन्त्रको हैसियतमा उमेदवार बनेका छनर भने राष्ट्रिय प्रजातन्त्र पार्टी (राप्रपा)का उमेदवार विक्रम पाण्डे छन्  ।

निर्माण व्यवसाय क्षेत्रमा चिनिएका पाण्डे राजनीतिमा पनि नयाँ अनुहार होइनन् । उनी यही क्षेत्रबाट पाँचौँपटक संसदीय निर्वाचन लड्दै छन् । २०७० सालको समानुपातिक मत परिणाममा राप्रपाको मत कम देखिए पनि उक्त पार्टीका उमेदवार विक्रम पाण्डेको प्रभाव माडी र पश्चिम चितवनका केही वडा राम्रो छ । उक्त क्षेत्रबाट सधैँ उमेदवार बनेका, एकपटक निर्वाचन जितेका र मन्त्रीसमेत भइसकेका पाण्डेले अन्य पार्टीको भोट पनि तान्न सक्ने आकलन गरिन्छ । उता, पैसा बाँडरै मतदाता किन्न सक्ने नेताको रुपमा पनि उनीमाथि आरोप लाग्दै आएको छ ।

पाण्डेले चुनाव जित्न उनका कार्यकर्ताले सोचेजस्तो सहज भने छैन । चितवन क्षेत्र नम्बर ३ मा बढी भोट भएका भरतपुर महानगरपालिकाका वडामा राप्रपाको जनाधार कमजोर छ ।

वैशाखमा भएको स्थानीय निर्वाचनमा एमालेलाई समर्थन गरेका कारण महानगरका धेरै वडामा राप्रपाको जनमत कस्तो छ ठ्याक्कै भन्न कठिन भए पनि मतगणनाको क्रममा देखिएको ‘भोटिङ ट्रेन्ड’ हेर्दा पश्चिम चितवनका वडा नम्बर २३ र २४ मामात्रै राप्रपाका मतदाता बढी देखिएका थिए ।

महानगरका वडाबाट गठबन्धनका उमेदवार डा भोजराज अधिकारीलाई राम्रो भोट आउन सक्छ । पेसागत रुपमा उनले कमाएको ख्यातिको प्रभाव महानगरका वडामा देखिने सम्भावना छ । डा अधिकारी दाबी गर्छन्, ‘मैले यो क्षेत्रका करिब एक लाख १५ हजारको उपचार गरेँ होला, उहाँहरुमध्ये ५० हजार जनाजति अहिले पनि मेरो सम्पर्कमै हुनुहुन्छ । उहाँहरुसँग मेरो सम्बन्ध बेग्लै खालको छ, यो पनि मेरो जितको एक आधार हो ।’

६ ‘स’ को एजेन्डा प्रस्तुत गर्दै उनले यहाँका जनताको जीविकोपार्जनमा सहज हुने नीति बनाउने बताए । स्वास्थ, शिक्षा, स्वरोजगार, सामाजिक सुरक्षा, सेवा र सडक सञ्जालमार्फत अघि बढ्ने उनले प्रतिबद्धता व्यक्त गरेका छन् ।

भरतपुर महानगरपालिकाकी मेयर रेनु दाहालको प्रभाव पश्चिम चितवनमा बढी छ । पश्चिम चितवनलाई केन्द्रित गरेर सडक संरचनाको विकास गरेको जस उनलाई छ । दाहाल सक्रिय भएर लागेको अवस्थामा त्यो भोट अधिकारीका लागि सुरक्षित हुन सक्छ ।

एमालेले पार्टीका जिल्ला अध्यक्ष रामप्रसाद न्यौपानेलाई उमेदवार बनाएको थियो । तर, एमाले अध्यक्ष केपी शर्मा ओलीले निर्वाचन कार्यालयलाई पत्र पठाएर न्यौपानेको उमेदवारी फिर्ता लिइदिए । नेकपा एमालेले यस क्षेत्रमा नेपाली कांग्रेसबाट बागी उमेदवारी दिएका दिनेश कोइरालालाई सहयोग गर्दैछ ।

पार्टी निर्णयविरूद्ध स्वतन्त्र उमेदवारी दिएका केन्द्रीय सदस्य कोइरालासहित उनको उमेदवारी दर्ता गर्न प्रस्तावक र समर्थक बनेका कार्यकर्तालाई नेपाली कांग्रेसले पार्टीबाट पाँच वर्षलाई निलम्बन गरेको छ । यद्यपि कोइरालाको प्रभाव चितवनको क्षेत्र नम्बर ३ मा राम्रो मानिन्छ । एमालेको साथ पाएको अवस्थामा उनलाई नेपाली कांग्रेसका कार्यकर्ताले पनि भोट हाल्न सक्ने विश्लेषण पनि गरिन्छ ।

चितवन–३ नेपाली कांग्रेसलाई चाहिन्छ भनेर आवाज उठाइरहँदा पनि गठबन्धनको भागबण्डामा त्यसो नभएको भन्दै कोइरालाले उमेदवारी दिएको बताउँछन् । नेतृत्वले सधैँ अर्को पार्टीका मान्छेलाई सहयोग गरेपछि आफ्नो पार्टी जोगाउने विद्रोह गरेको कोइराला बताउँछन् । ‘नेतृत्वले जे भन्छन् त्यो मान्दै जाने हो भने त अब भरतपुरमा कांग्रेसको सिला खोज्नुपर्ने अवस्था आउन सक्छ’, उनले भने ।

कोइरालालाई निर्वाचन जित्न नै भने सजिलो छैन । उनलाई एमालेले समर्थन गरे पनि एमालेको सबै भोट नआउन सक्छ । निर्वाचन जित्न उनले एमालेको सबै भोट पाएर कांग्रेसबाट करिब ४० प्रतिशत भोट ल्याउनुपर्छ । आफ्ना उमेदवार नहुँदा एमालेको भोट सबैतिर बाँडिन सक्छ । उमेदवारी दर्ता गरिसकेका उमेदवारलाई फिर्ता गरेकोमा एमालेका कार्यकर्ता पार्टी नेतृत्वसँग रूष्ट छन् । नेतृत्वसँग रूष्ट कार्यकर्ताले नेतृत्वले भनेकै ठाउँमा सबै भोट नखन्याउन सक्छन् ।

भरतपुर महानगरपालिकाबाट कांग्रेसका असन्तुष्ट कार्यकर्ताको नेतृत्व गरेर मेयरमा उमेदवारी दिएका जगन्नाथ पौडेलले क्षेत्र नम्बर ३ मा पर्ने १९ वटा वडाबाट आठ हजार २५३ भोट ल्याएका थिए । पौडेल यसपालि प्रतिनिधिसभा सदस्यका लागि पनि उमेदवार छन् । नेपाली कांग्रेसका पुराना कार्यकर्ताको भोट उनले यसपालि पनि तान्न सक्छन् ।

भारतसँग जोडिएको ठोरी र चीनसँग जोडिएको केरूङसम्मको सडक र पश्चिम चितवनलाई नवलपुरसँग जोड्न नारायणी नदीमा पुल बनाउने मुख्य एजेन्डा उठाउँदै आएका तारा पौडेलले विकास र समृद्धिका लागि आफ्नो उमेदवारी रहेको बताउने गरेका छन् । राजनीतिलाई अधिकारसँगमात्र नभएर विकास र समृद्धिसँग जोड्नुपर्छ भनेर बहस गर्दै आएका पौडेलले कांग्रेसको केही भोट काट्न सक्छन् ।

रवि लामिछाने नेतृत्वको राष्ट्रिय स्वतन्त्र पार्टीले जिता बराललाई यस क्षेत्रबाट उमेदवार बनाएको छ । उनले स्थानीय निर्वाचनमा भुइँकटहर निर्वाचन चिन्ह लिएर उठेका जगन्नाथ पौडेललाई सहयोग गरेकी थिइन् । यस क्षेत्रबाट २० जना उमेदवारहरु मैदानमा छन् । चितवन क्षेत्र नम्बर ३ मा भरतपुर महानगरपालिकाका १९ वडा र माडी नगरपालिका पर्छन् । यहाँ यसपालि एक लाख ४४ हजार २८३ जनाले मतदान गर्न पाउँछन् ।