सत्तारुढ नेपाली कांग्रेसले पार्टी मुख्यालय सानेपामा आगामी ४ मंसिरको चुनाव लक्षित घोषणापत्र सार्वजनिक गरेको छ।
शनिबार पार्टी सभापति एवं प्रधानमन्त्री शेरबहादुर देउवाले उक्त घोषणापत्र सार्वजनिक गरेका हुन्।
५२ पृष्ठ समेटिएको कांग्रेसको घोषणापत्रमा विभिन्न खण्ड समावेश गरेर समसामयिक राजनीति, निरन्तरतामा नवीनता, समुन्नत नेपालका एजेन्डा, संघीयता, आर्थिक व्यवस्थापनलगायत विषय समेटिएका छन्।
कार्यक्रममा कांग्रेसको घोषणापत्र लेखन समिति संयोजक एवं महामन्त्री विश्वप्रकाश शर्मा, प्रवक्ता डा. प्रकाशशरण महतलगायत उपस्थित थिए।
उक्त अवसरमा कांग्रेस घोषणापत्र लेखन कार्यदलका सदस्य डा. स्वर्णिम वाग्लेले घोषणापत्र सबै क्षेत्रलाई समेट्ने गरी यथार्थपरक रूपमा लेखिएको बताए। यो घोषणापत्र २००५ देखि र गत स्थानीय तह चुनावका मुद्दाको निरन्तरता रहेको उनको भनाइ छ।
घोषणापत्रमा युवा बेरोजगारी अन्त्यका आधार समेटिएको र कांग्रेसको सरकार बने वार्षिक साढे २ लाख रोजगारी सिर्जना गर्ने कार्यक्रम ल्याइने उनले जानकारी दिए।
डा. वाग्लेले भने, ‘घोषणापत्रमा अर्थतन्त्र बलियो बनाउने आधार समेटिएका छन्। अर्थतन्त्रलाई चलायमान बनाएर रोजगारी सिर्जना गर्नु र देशलाई समृद्ध बनाउनु नै घोषणापत्रमा जारी प्रतिबद्धताको मूल लक्ष्य रहेको छ।’
कांग्रेसको घोषणापत्रमा एमाले राज्य सञ्चालनमा असफल भएको, बहुमत हुँदाहुँदै पनि दुई–दुई पटक संसद् विघटन गराएको, जनताका समस्याप्रति चासो नदिएको, आफ्नै झगडाका कारण नेकपा विघटन भएको उल्लेख छ।
