काठमाडौं । ‘आईसीसी विश्व क्रिकेट लिग टु’ अन्तर्गत नामिबियाविरुद्धको खेलमा नेपालले २८६ रनको लक्ष्य पाएको छ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा आजदेखि सुरु भएको त्रिकोणात्मक शृंखलाको पहिलो खेलमा नामिबियाले निर्धारित ओभरमा सबै विकेट गुमाउँदै २८५ रन बनायो ।
टस हारेर पहिले ब्याटिङ गरेको नामिबियाका माइकल भान लिन्गेनले शतक पूरा गर्दै सर्वाधिक १३३ रन बनाए । उनको उत्कृष्ट प्रदर्शनसँगै नामिबियाले नेपाललाई जितका लागि चुनौती दिएको छ ।
कप्तान गेरहार्ड इरास्मसले अर्ध शतकीय पारी खेल्दै ५६ रन बनाए । जेन ग्रीनले ३४ रन बनाउँदा जान फ्रिलिंक र कार्ल बिर्केनस्टोकले १३ – १३ रन जोडे । रुबेन ट्रम्पेल्मनन्ले ११ रन जोड्नुबाहेक अन्य ब्याटरले दोहोरो अंक बनाउन सकेनन् ।
नेपालका लागि करण केसीले सर्वाधिक ५ विकेट लिए । उनले १० ओभरमा १ मेडन राख्दै ६१ रन खर्चिए । यस्तै ६६ रन खर्चिएर सन्दीप लामिछानेले ३ विकेट लिए । कुशल मल्ल र सोमपाल कामीले १-१ विकेट लिए ।
नेपालले केहिबेरमा जवाफी ब्याटिङ सुरु गर्नेछ ।
नेपाल, स्कटल्यान्ड र नामिबिया सम्मिलित ‘आईसीसी विश्व क्रिकेट लिग टु’ त्रिकोणात्मक सिरिज आजदेखि सुरु भएको हो ।
यसअघि भएका चार खेलमा तीनमा नेपालले हार व्यहोरेको थियो । एक खेल वर्षाका कारण रद्द भएको थियो ।
गत जुलाइमा स्कटल्यान्डमा भएको सिरिजमा नेपाल नामिबियासँग पहिलो खेलमा ४० र दोस्रो खेलमा ६३ रनले पराजित भएको थियो ।
डिसेम्बरमा फेरि नामिबिया र नेपाल आमनेसामने भएका थिए । पहिलो खेल वर्षाले हुन सकेन । दोस्रो खेलमा नेपालले ८६ रनको फराकिलो हार व्यहोर्यो ।
नेपालले लिग टु्का कुल ३६ मध्ये २४ खेल खेलिसकेको छ । १४ मा जित, १८ मा हार र एकमा बराबरीको नतिजाका साथ १८ अंक जोडेको नेपाल तालिकाको छैटौँ स्थानमा छ।
ओडीआई सिधै जोगाउन नेपाललाई बाँकी १२ मध्ये कम्तीमा ९ खेलमा जित हात पार्नु पर्नेछ । त्यसैले घरेलु मैदानका चार खेलले नेपालको आगामी भविष्य तय गर्नेछ ।
नामिबिया ३० खेलबाट ३७ अंक बटुल्दै तेस्रो स्थानमा छ । नेपालसामू घरेलु मैदान र समर्थकको फाइदा रहनेछ । यही खेलमार्फत मोन्टी देसाइले नेपालको प्रशिक्षकका रुपमा डेब्यु गर्दैछन् ।
