चितवन, चैत १८ : चितवनको खैरहनीस्थित रामपुर कृषि क्याम्पसमा एकलौटी ढंगबाट शुक्रबार स्वतन्त्र विद्यार्थी युनियन (स्ववियु)को निर्वाचन भयो । विवादको बीचमा भएको निर्वाचनमा अखिल संयुक्त प्यानल विजयी भयो ।

नेपाली कांग्रेस निकट नेपाल विद्यार्थी संघ निर्वाचनमा सहभागि भएन । क्याम्पस प्रशासन र प्रहरी प्रशासन मिलेर एकलौटी ढंगबाट निर्वाचन गरिएको नेविसंघले आरोप लगाएको छ । सहमति बिना एकलौटी चुनाव गर्न लागेको भन्दै विरोध गर्दा आफ्ना विद्यार्थी नेता कुटिएको नेविसंघ चितवनका सभापति राजेश भुषालले बताए । विद्यार्थी नेताहरुलाई निर्ममतापूर्वक कुटपिट गरी हतकडी लगाएर हिरासतमा राखिएको भन्दै सभापति भुषालले बिरोध जनाए । उनले शुक्रबार साँझ नै एक विज्ञप्ती जारी गरी सो कलेजमा तत्कालै स्ववियू निर्वाचन स्थगित गरी हिरासतमा लिईएका विद्यार्थी नेताहरुलाई रिहा गर्न प्रहरी प्रशासनलाई आग्रह गरेका छन् । विज्ञप्तीमा भनिएको छ–‘अन्यथा यसबाट सिर्जित हुन सक्ने सम्पूर्ण परिस्थितिको जिम्मेवारी स्वंम क्याम्पस प्रशासन र प्रहरी प्रशासनले लिनुपर्ने चेतावनी दिन्छौं ।’

नेविसंघका अनुसार क्याम्पस इकाई सभापति आशिष देवकोटा र निवर्तमान इकाई सभापति सुरज यादव घाइते भएका छन् । घाइतेहरुको चितवन मेडिकल कलेजमा उपचार भइरहेको छ । शुक्रबार एकलौटी रुपमा गरिएको निर्वाचनमा १२० जनाले मात्रै मतदान गरेका थिए । जबकी यस कलेजमा कुल २४१ जना मतदाता रहेका थिए । वर्तमान क्याम्पस प्रमुख मिलन सुवेदी र निर्वाचन अधिकृतक सूर्य प्रसाद भट्ट अनेरास्ववियु क्रान्तिकारी रामपुर क्याम्पसका पूर्व अध्यक्ष र सचिव भई हाल यस क्याम्पसमा प्राध्यापक रहेका छन् । त्यसैको आडमा अखिल संयुक्तलाई विजयी घोषणा गर्नेगरि एकलौटी ढंगले निर्वाचन गरिएको नेविसंघको आरोप छ । यस क्याम्पसमा नेकपा एमाले निकट अनेरास्ववियु र नेकपा (माओवादी केन्द्र) निकट अखिल क्रान्तिकारी मिलेर अखिल संयुक्तको रुपमा निर्वाचन लडेका थिए ।

नेविसंघका उम्मेदवारको शून्य भोट

निर्वाचन अधिकृत सूर्यप्रसाद शर्माले घोषणा गरेको मतपरिणामले पनि देखाउँछ रामपुर क्याम्पसमा कसरी निर्वाचन भयो । जबकी उम्मेदवारी दर्ता गर्दा नेविसंघले पनि आफ्ना उम्मेदवार उठाएको थियो । तर नेविसंघका कुनै पनि उम्मेदवारले भोट पाएनन् । नेविसंघका उम्मेदवारको भोट शून्य रह्यो ।

यस्तो निर्वाचनलाई कुनै पनि हालतमा मान्न नसकिने नेविसंघले बताई सकेको छ । नेविसंघबाट सभापतिका उम्मेदवार आशिष देवकोटाको शून्य मत प्राप्त भयो । अखिल संयुक्तका उम्मेदवार बनेका दिवस पौडेल ११९ मत प्राप्त गरे । उनैलाई निर्वाचन समितिले विजयी घोषणा गर्‍यो । सचिवमा उम्मेदवारी दिएका नेविसंघका विवेक अर्यालको १, कोषाध्यक्षका उम्मेदवार समिक्षा बस्नेतको ५ मत प्राप्त भएको निर्वाचन अधिकृतले घोषणा गरेको परिणाम उल्लेख छ ।

सदस्यमा उम्मेदवारी दिएका ५ जना मध्ये एक जनाको शून्य र अर्का ४ जनाले समान १ भोट मात्र प्राप्त गरे ।