ओखलढुंगा : चम्पादेवी गाउँपालिका ८ बिलन्दुमा बिहीबार रातिको भीषण वर्षापछि गएको पहिरोले ३ घर बगाएको छ ।
पहिरोमा परी २ जनाको मृत्यु भएको छ भने २ जना बेपत्ता भएका छन् ।
पहिरोले घर पुरिँदा स्थानीय ३६ वर्षका रणबहादुर गुरुङ र उनकी पत्नी ३१ वर्षीया शिवमाया गुरुङको मृत्यु भएको हो । त्यसैगरी उनीहरुका १० वर्षका छोरा दिनेश गुरुङ र १८ महिनाकी छोरी कृतिका गुरुङ बेपत्ता छन् । बेपत्ताको खोजी कार्य भइरहेको जिल्ला प्रहरी कार्यालय ओखलढुंगाका डिएसपी दिपकबहादुर केसीले बताए ।
स्थानीय अन्य २ जना बलबहादुर गुरुङ र जरसिंह गुरुङको घर बगाएको छ। उनीहरु भने भागेर ज्यान जोगाउन सफल भएका थिए । राति नै स्थानीयले प्रहरीलाई पहिरोबारे जानकारी दिएपछि नेपाल प्रहरी, सशस्त्र प्रहरी लगायतको टोली घटनास्थल पुगेर स्थानीयसहित उद्धारमा खटिएका थिए । उद्धारका लागि थप प्रहरीसमेत जिल्लाबाट खटाइएको छ ।
