चितवन, साउन २३: चितवन जिल्ला अदालतले पुर्पक्षको लागि थुनामा पठाउने आदेश दिएपछि अदालतमा अचानक ब्लड प्रेसर बढेर ढलेका व्यवसायी प्रदिप रुङ्गटा अझै भरतपुर अस्पतालमा उपचार गराइरहेका छन् ।

साउन १८ गते व्यवसायी शंकर कँडेलको आत्महत्या दुरुत्साहन मुद्दामा अदालतले पुर्पक्षको लागि थुनामा पठाउन आदेश दिएसँगै रुङ्गटा बिरामी भएका हुन् । रुङ्गटा तीन महिनापछि मात्र फरार प्रतिवादीको रुपमा अदालतमा हाजिर भएका थिए ।

आदेशसँगै अदालत परिसरमै बेहोस भएपछि अस्पताल लगिएको उनको अझै भरतपुर अस्पतालमा उपचार भइरहेको अस्पतालका मेडिकल सुपरिटेण्डेन्ट कृष्णप्रसाद पौडेलले नारायणी अनलाइनलाई जानकारी दिए । उनले भने, ‘ केही ठीक भएपछि कारागार गएका उनी फेरि प्रेसर बढेपछि अस्पतालमा आएर उपचार गराइरहेका छन् । उनको प्रेसर, मुटुको धड्कन बढी छ । सम्भवत भोलि बुधबार डिस्चार्ज हुने सम्भावना छ । डिस्चार्जपछि कता जान्छन् के प्रक्रिया हुन्छ थाहा भएन । ’

त्यसैगरी जिल्ला प्रहरी कार्यालय चितवनका प्रहरी प्रवक्ता विजय पण्डितले सुरक्षा निगरानीमा नै रुङ्गटाले अस्पतालमा उपचार गराइरहेको नारायणी अनलाइनलाई जानकारी दिए । उनले भने, ‘ हाम्रो निगरानीमा उपचार भइरहेको छ । के कसरी उपचार भइरहेको छ भन्ने हामीलाई थाहा हुँदैन ।’

जिल्ला न्यायाधीश डिल्लीराम शर्मा अर्यालको इजलासले रुङ्गटालाई पुर्पक्षको लागि थुनामा पठाउने आदेश गरेको थियो । चितवनका व्यवसायी कँडेलले वैशाख १९ गते अनमोल फिल्डको कार्यालय बेलचोकमा झुण्डिएर आत्महत्या गरेका थिए । उनको मृत्युपछि परिवारले रुङ्गटा र जीवन रावल विरुद्ध आत्महत्या दुरुत्साहनको आरोप लगाउँदै किटानी जाहेरी दिएका थिए । रावललाई प्रहरी वैशाख २२ गते पक्राउ गरी चितवन ल्याएको थियो । उनी उच्च अदालतको आदेशबाट धरौटीमा रिहा भएका छन् । कँडेलको मृत्युपछि रुङ्गटा फरार रहँदै आएका थिए ।

कँडेलले आफूले नेतृत्व गर्दै आएको अनमोल फिड्सको ८५ प्रतिशत शेयर रुङ्गटालाई बिक्री गरेपछि सो समूहले मानसिक तनाव दिएकै कारण आत्महत्या गर्नुपरेको ‘सुसाइड नोट’मा उल्लेख गरेका थिए । उनको मृत्युसँगै कँडेलका समर्थकहरुले न्यायको लागि भन्दै चितवनका विभिन्न ठाउँमा विरोध प्रदर्शन गर्नुका साथै चितवन बन्द पनि गरेका थिए ।