भरतपुर । क्यान्सरको उपचार समयमै नपाउँदा भरतपुरको एक होटलको कोठामा महिलाको मृत्यु भएको छ । वीपी कोइराला मेमोरियल क्यान्सर अस्पतालमा उपचार गराउन आएकी झापा भद्रपुर बस्ने सूर्य पोखरेलको श्रीमति ४० वर्षीय सोनिया पोख्रेलको अकालमै मृत्यु भएको हो ।
अस्पताल अगाडिको माडी पाहुना घर एण्ड लजको एउटा कोठामा बुधबार सोनिया मृत फेला परेकी हुन् । सोनिया पाठेघर सम्बन्धि समस्या भएपछि उपचारको लागि आफ्नो श्रीमानसँग साउन २० गते भरतपुर आएकी थिइन् ।
बुधबार बिहान ६ बजे अस्पताल जान्छु भनेर गएका श्रीमान सम्पर्क विहिन भएको र होटलको कोठामा महिला मृत अवस्थामा भेटिएपछि होटल सञ्चालकले प्रहरीलाई खबर गरेका थिए । मृतकका श्रीमान बेलुका सम्पर्कमा आएको जिल्ला प्रहरी कार्यालय चितवनका प्रहरी निरीक्षक कुसल बर्ताैलाले बताए ।
‘शवको पोस्टमार्टम रिपोर्ट आउन बाँकी छ । घटनास्थल हेर्दा प्रहरी केश चाँहि होइन’, उनले भने, ‘उपचारका लागि आएको बेला रोगले अत्यधिक ग्रसित भएर महिलाको कोठामै मृत्यु भएको देखिन्छ ।’ मृतक महिला र उनको श्रीमान आर्थिक रुपले अत्यन्न कमजोर रहेको पाइएको उनले बताए ।
