चितवन, भदौ ०३ :रोटरी क्लब अफ नारायणघाटले माडीको अम्रौलीमा सिंचाई आयोजना सुरु गरेको छ । एक करोड ३६ लाख १० हजार ४२५ रुपैयाँको लागतमा आयोजना निमार्ण गर्न लागिएको हो । आकाशे पानीको भरमा खेती गर्दै आएका माडी नगरपालिका वडा नम्बर चार को अम्रौली र विराचीका कृषकको लागी सोलारमा अधारित बोरिङ स्थापना गर्न लागिएको हो ।
माडी नगरपालिका प्रमुख ताराकाजी कुमारी महतो र क्लबका अध्यक्ष भोला लामिछानेले शिलन्यास गरेका थिए । लामिछानेले एक वर्षभित्र आयोजना सम्पन्न गरेर समुदायलाई हस्तान्तरण गरिने बताए ।करिब ६६ विगाहा जग्गामा सिंचाई गराउन लागिएको हो । आयोजनाको लागी रोटरी डिष्ट्रिक ११६० अन्र्तगतको आयरल्याण्डका सात वटा क्लबले सहयोग गरेका छन् । यसका लागी बेलायतमा बस्दै आएका विनोद कर्माचार्यले सहजीकरण गरेका थिए ।
मेयर महतोले विपन्न गाँउमा रोटरीले परोपकारी काम गरेको भन्दै रोटरीको अभियानको प्रसंसा गरिन् । उनले नगरपालिकाको तर्फबाट धन्यवाद ब्यक्त गरिन् । रोटरी क्लब डिष्ट्रिक २५९२ नेपाल भुटानका एसिस्टेण्ट गर्भनर दिनुप बरालले विश्वभरका रोटरीले उठाएको पैसाबाट बनेको ग्लोबल बजेटबाट रोटरीले सामाजिक काम गर्दै आएको बताए । यो संस्था अन्य गैर सरकारी निकाय भन्दा फरक रहेको बताए ।
कार्यक्रममा रोटरी क्लब अफ नारायणघाटका संस्थापक अध्यक्ष निरञ्जन प्रधानले स्वार्थभन्दा माथी सेवा भन्ने रोटरीको उद्देश्यलाई आत्मसाथ गर्दै नारायणगढ रोटरीले सामाजिक विकासको लागी नेतृत्वदायी भूमिका खेलेको बताए ।
कार्यक्रममा क्लबका प्रथम उपाध्यक्ष गुणेश्वर महतो , सचिव सेवन पन्तले सिंचाई आयोजना वारे जानकारी गराँउदै खेतीयोग्य जमिन धेरै भएको तर सिंचाई नभएको कारण अम्रौलीमा बोरिङ राख्न लागेको बताए ।
