क्रिस्टियानो रोनाल्डोले ह्याट्रिक र साडियो मानेले दुई गोल गरेको खेलमा अल नासरले साउदी प्रो लिगको जारी सिजनमा पहिलो जित निकालेको छ। फराकिलो जित निकाल्ने क्रममा नासरले अल फतेहलाई ५-० ले पराजित गर्याे।
प्रिन्स अब्दुल्लाह विन जलावी स्पोर्ट्स सिटी स्टेडियममा शुक्रबार राति भएको खेलमा २७ औं मिनेटमा मानेको गोलबाट नासरले खेलमा अग्रता बनायो। ३८औं मिनेटमा रोनाल्डोले सुल्तान अल घनामको पासमा गोल गर्दा अल नासरले पहिलो हाफमा २-० अग्रता लियो।
५५ औं मिनेटमा रोनाल्डोले व्यक्तिगत दोस्रो तथा टोलीका लागि तेस्रो गोल गर्दा टिम सहज जिततर्फ अग्रसर भएको थियो।
८१ औं मिनेटमा मानेले व्यक्तिगत दोस्रो गोल पूरा गर्दा रोनाल्डोले इन्जुरी समयको छैटौं मिनेटमा ह्याट्रिक पूरा गर्दा नासरले ५-० को फराकिलो जित निकाल्न सफल भयो। नयाँ सिजनको तेस्रो खेलमा नासरको यो पहिलो जित हो।
१८ क्लब सहभागी रहेको प्रतियोगितामा तीन खेलको समाप्तिपछि नासर एक जित र २ हार सहित ३ अंक बनाएर १० औं स्थानमा उक्लिएको छ।
