प्रहरीलाइ दैवी प्रकोप उद्धार सामग्री हस्तान्तरण
चनौली । नेपाल रेडक्रस सोसाईटी चनौली उपशाखाले इलाका प्रहरी कार्यालय चनौलीलाई दैवीप्रकोप उद्वार सामाग्रीहरु हस्तान्तरण गरेको छ ।
विपदमा प्रहरीसंग रेडक्रस चनौली कार्यक्रम अन्तर्गत पश्चिम चितवन क्षेत्रमा पर्न सक्ने दैवीप्रकोपलाई न्यूनीकरण गर्न सक्ने सम्भावनालाई मध्यनजर गर्दै ति सामाग्री हस्तान्तरण गरिएको हो ।
बाग्मती प्रदेश सांसद माया श्रेष्ठको प्रमुख आतिथ्यतामा सम्पन्न कार्यक्रममा ने.रे.सो चनौली उपशाखा सभापती ओमप्रसाद लामिछानेले इलाका प्रहरी कार्यालय चनौलीमा प्रमुख भानुभक्त आचार्यलाइ दैवीप्रकोप उद्धार सामाग्री स्टेचर १ थान, डोरी (२१ मि दरका)२ थान, फलामको वाल्टीन २ थान, वेल्चा २ थान, गैची २ थान, कम्वल ४ थान, फलामको हुक ३ थान, लाईफ ज्याकेट ४ थान,फायर गन (ए.वि.सि क्याटागोरीको)१ थान, फोरुवा १ थान,आरा(रुख काट्न प्रयोग गरिने ५ फिट लामो)१ थान, शव प्याकिङ प्लाष्टीक प्याक ४ थान, वारुण यन्त्र कक्ष १, खन्ती १ थान हस्तान्तरण गरेका थिए ।
प्रमुख अतिथी प्रदेश सांसद माननिय श्रेष्ठले ईलाका प्रहरी कार्यालय चनौली “ख” वर्गको रहेकोले “क” वर्गको ईलाका प्रहरी कार्यालय बनाउन सकिए सहज तरिकाले सुविधा पाउन सकिने वताइन ।
उक्त अवसरमा बोल्दै चितवनका प्रमुख जिल्ला अधिकारी भुपेन्द्र थापाले स्थानीय समुदायलाई विपदप्रति सजग गराउँदै वडा स्तरसम्म विपद पूर्वतयारी र प्रतिकार्य समिति गठन गरी उनीहरुकै सहयोगमा विपद प्रतिकार्यका लागि नमुना अभ्यासहरू गराउन सके विपदको समयमा शीघ्र रूपमा मैदानमा उत्रन सजिलो हुने वताए ।
उक्त अवसरमा स्थानिएले बुझाएको ज्ञापनपत्र ग्रहण गर्दै अधिकारी थापाले पश्चिम चितवनको व्यपारीक केन्द्र बन्दै गरेको चनौलीबजारमा रहेको इलाका प्रहरी कार्यालयलाइ स्तरोत्तरी गरेर “ख” वर्गको रहेकोले “क” वर्गको बनाउन र चनौली मालपोत कार्यालयको भवन बनाउन स्थानिए समाजसेवी महेन्द्र श्रेष्ठले दिएको जग्गा कार्यालयको मातहतमा ल्याउन पहल गर्ने वताए।
प्रहरी उपरीक्षक रामेश्वर कार्कीले स्थानीय तहले आफ्नो गाउ र नगर क्षेत्रभित्र सम्भाव्य विपदको जोखिममा रहेका क्षेत्रहरू जस्तै नदी कटान, बाढी, डुबान, पहिरो, भूक्षय भएको क्षेत्रहरू पहिचान गर्न सक्नु र त्यसका लागि आवश्यक पहल गर्नुपर्ने वताए।
रेडक्रस चनौली उपशाखाका विपद् व्यवस्थापन समितीका संयोजक देवीप्रसाद पौडेलको सभा अध्यक्षतामा सम्पन्न ने.रे.सो चनौली उपशाखा सभापती ओमप्रसाद लामिछाने, पुर्व सभापतीहरू लक्ष्मीकान्त दवाडी र एकनारायण पौडेल,भरतपुर १७ का वडाध्यक्ष ललितमान तामाङ लगायतले मन्तव्य व्यक्त गरेका थिए।
चनौली उपशाखाले नयाँ एम्बुलेन्स खरीद, इमर्जेन्सी क्लिनिक सञ्चालन, नियमित रक्तदान कार्यक्रम, आँखा परीक्षण तथा पाठेघर क्यान्सर परिक्षण लगायतका स्वास्थ्य शिविरहरू, वृक्षरोपण, विद्यालय तथा बजार सरसफाइ अभियान, विद्यालयहरुमा जुनियर युवा रेडक्रस गठन लगायतका कार्यक्रमहरु गरेको सभापती लामिछानेले जानकारी दिए ।
