कुरिनटार, भदौ १९ ः दोश्रो इच्छाकामना महोत्सव २०८० हुने भएको छ । चितवनको इच्छाकामना गाउँपालिका–४ कुरिनटारमा भदौ २७ गतेदेखी असोज ७ गते सम्म महोत्सव हुने भएको हो । आर्थिक गतिविधि चलायमान बनाउन तथा स्थानीय उत्पादन र पर्यटन प्रवर्द्दनका लागि इच्छाकामना गाउँपालिका वडा नम्बर ४ को कार्यालय कुरिनटार र उद्योग वाणिज्य संघ मुग्लिनको आयोजना तथा सामुदायिक रेडियो इच्छाकामना एफएम कुरिनटारको सह–आयोजनामा महोत्सव हुने भएको हो ।

सोमबार कुरिनटारमा पत्रकार सम्मेलन आयोजना गरि महोत्सवबारे जानकारी गराइएको हो । महोत्सवमा करिब १ लाख दर्शकले अवलोकन गर्ने वडा नम्बर ४ का वडाध्यक्ष तथा महोत्सव संयोजक रुद्र उप्रेतीले जानकारी दिए ।

उद्योग वाणिज्य संघ मुग्लिनका अध्यक्ष कल्याण गुभाजुले पछिल्लो समय शिथिल बनेको इच्छाकामनाको अर्थतन्त्रलाई यस महोत्सवले चलायमान बनाउने विश्वास व्यक्त गरे । महोत्सवलाई सफल बनाउन विभिन्न उपसिमिति निर्माण गरि काम गरिरहेको उनले बताए । इच्छाकामनाको गौरवको रुपमा लिएको यस महोत्सवलाई सबै इच्छाकामना बासी मिलेर सफल बनाउने उनले बताए ।

उद्योग वाणिज्य संघ मुग्लिनका उपाध्यक्ष तथा मस्र्याङ्दी बहुदेश्यीय सहकारी संस्था मुग्लिनका प्रबन्धक कुमार श्रेष्ठले महोत्सवको अवसरमा यहाँका होटल तथा रिर्सोटहरुमा छुटको व्यवस्था दिइने बताए । यहाँको पर्यटन प्रवद्र्धनका साथै स्टलहरुमा स्थानीय उत्पादनलाई प्राथमिकता दिइने उनको भनाइ छ ।

गाउँपालिका उपाध्यक्ष माया सिलवालले महोत्सवमा किनवेच हुने सामानाहरुको गुणस्तरमा ध्यान दिनुपर्ने बताइन् । साथै उपाध्यक्ष सिलवालले महोत्सवको बहानामा विभिन्न जुवा खेलाउने प्रचलन रहेकोमा यसलाई स्थान दिन नहुने उनले बताइन् ।

कार्यक्रममा गाउँपालिका अध्यक्ष दान बहादुर गुरुङले आर्थिक गतिविधिलाई चलायमान बनाउनका लागि महोत्सवले महत्वपूर्ण भुमिका खेल्ने बताए । साथै उनले यहाँ रहेको पर्यटकीय स्थलहरुको प्रवर्द्दन, स्थानीय उत्पादनको प्रवर्द्दन र कला साहित्य संस्कृतिको उजागर तथा संरक्षण गर्न मदत पुग्ने बताए । उनले महोत्सवबाट गाउँपालिकामा आउने कर बापतको सम्पूर्ण रकम विपन्न बालबालिकाको शिक्षामा खर्च गरिने समेत बताए ।

महोत्सवमा २०० सटल रहने आयोजकले जनाएको छ । स्थानीय उत्पादनका १५ वटा स्टलहरुलाई कुनै शुल्क नलाग्ने बताइएको छ । महोत्सवको प्रवर्द्दक एंव संरक्षक इच्छाकामना गाउँपालिका र उद्योग वाणिज्य संघ चितवन रहेको छ ।

इच्छाकामना महोत्सवका आकर्षणहरु

धार्मिक तथा पर्यटकीय स्थलहरु इच्छाकामना मन्दिर, जय बालगौरी पाथिभरा सिहंदेवी मन्दिर, मनकामना मन्दिर, सिराइचुली, उपर्दाङ्गगढी, लामो झरनाको अवलोकनका लागि विशेष प्याकेजमा यात्रा, आदीवासी जनताजाती तथा सीमान्तकृत समुदायको भेषभुषा रहनसहन तथा संस्कृतिहरुको प्रदर्शनी, औद्योगीक प्रदर्शनी, घरेलु एंव कृषि प्रदर्शनी, राष्ट्रिय तथा स्थानिय कलाकाहरुबाट दैनिक मनोरञ्जनात्मक कार्यक्रमहरु र साथमा तीज गीत प्रतियोगिता र विविध बाल मनोरञ्जनका खेलहरु तथा त्रिशुली नदीमा ¥याप्टीङ्गको व्यवस्था रहेको छ ।