चितवन, असोज १९ :यातायात व्यवस्था कार्यालय चितवनले नयाँ सवारी चालक अनुमति पत्र, नविकरण तथा वर्ग थप गर्ने प्रयोजनका लागि स्वास्थ्य परीक्षण सम्बन्धि सेवा दिन इच्छुक फर्म तथा कम्पनीलाई प्रस्ताव पेश गर्न आह्वान गरेको छ । राष्ट्रिय स्वतन्त्र पार्टीका सभापति एवम् चितवन २ का सांसद रवि लामिछानेले यातायात कार्यालयको अनुगमन गरेपछि कार्यालयले प्रस्ताव आह्वान गरेको हो ।
निरोगिताको प्रमाण पत्रको ३५० रुपैयाँ लिइएको सेवाग्राहीको गुनासो आएपछि लामिछाने यातायात कार्यालय पुगेका थिए । व्यवसायीले मनलाग्दी शुल्क असुलेको भन्दै त्यसलाई नियन्त्रण गर्न लामिछानेले यातायात कार्यालयका प्रमुखलाई निर्देशन पनि दिएका थिए ।
प्रतिस्पर्धाको माध्यमबाट स्वास्थ्य परीक्षण सम्बन्धि सेवा उपलब्ध गराउन कार्यालयले प्रस्ताव आह्वान गरेको हो । सेवाग्राहीसँग स्वास्थ्य परीक्षण गरे बापत लिने शुल्क स्पष्ट खुल्ने गरी असोज २८ गते दिउँसो १२ बजेभित्र प्रस्ताव पेश गर्न कार्यालयले आग्रह गरेको छ । सोहि दिन दिउँसो २ बजे प्रस्ताव खोलिने बताइएको छ ।
देशका विभिन्न यातायात कार्यालयमा स्वास्थ्य परीक्षण गरेको १५० रुपैयाँ लिने गरेका छन् । चितवनमा भने व्यवसायीको ब्रह्मलुट भइरहेको खबर पाएपछि लामिछाने असोज १० गते यातायात कार्यालय पुगेका थिए । त्यसपछि कार्यालयले असोज १४ गते १५ दिने सूचना निकालेर प्रस्ताव आह्वान गरेको हो ।
