दाङ, कात्तिक २५-आमाको हत्या प्रयासबाट घाइते भएकी नवजात शिशुको उपचारका क्रममा मृत्यु भएको छ। उपचारपछि पाँच दिन पहिले घर ल्याइएकी नवजात शिशुमा एकाएक समस्या उत्पन्न भएपछि बिहीबार बेलुका लमहीस्थित तुलसी बाल अस्पतालमा उपचारका क्रममा शिशुको मृत्यु भएको हो ।

१६ दिने शिशुलाई कात्तिक ८ गते दिउँसो लमही नगरपालिका–७ कप्तानगञ्जकी २५ वर्षीया निर्मा चौधरीले घाँटीमा चक्कुले रेटेर हत्या गर्न प्रयास गर्दै परिवारका सदस्यले देखेपछि उद्धार गरेका थिए । घाइते अवस्थामा उद्धार गरिएको उक्त शिशुको लमहीमा उपचार सम्भव नभएपछि थप उपचारका लागि लुम्बिनी प्रादेशिक अस्पताल बुटवलमा लगेर उपचार गरिएको थियो।

आमा निर्माले घरका मानिस खेतमा काम गर्न गएको समयमा घर पछाडि लगेर छोरीको घाँटी तरकारी काट्न प्रयोग गरिने चक्कुले रेट्दै गर्दा देवरले देखेका थिए।

छोरीको मृत्युपछि आमा निर्मालाई प्रहरीले पक्राउ गरेको छ। मानसिक स्वास्थ्य ठीक नभएकी भनिएकी आमा निर्मालाई यसअघि नै प्रहरीले नियन्त्रणमा लिएको भए पनि उपचारको लागि राप्ती स्वास्थ्य विज्ञान प्रतिष्ठान घोराहीमा पठाएको थियो। केही दिनको उपचारपछि आमालाई घरमा लगिएको थियो।

चिकित्सकले आमा र बच्चालाई सँगै नराख्नू भन्ने सल्लाह अनुरूप निर्मालाई उनकी छोरीलाई उपचारपछि घर फर्किंदा माइती पठाइएको थियो। छोरीको मृत्युपछि फेरि प्रहरीले शुक्रबार निर्मालाई नियन्त्रणमा लिएको हो। स्रोत: सेतो पाटी