धादिंङ्ग, मंसिर ४ : गायक, मोडल तथा पत्रकार प्रकाश ढकाल त्रिशूली नदी किनारमा मृत फेला परेका छन् । दुई दिनदेखि सम्पर्कविहीन उनी पृथ्वी राजमार्गअन्तर्गत धादिङको बेनीघाट रोराङस्थित कृष्णभीरमा आइतबार राति ९ बजे मृत फेला परेका हुन् ।
राष्ट्रिय लोक तथा दोहोरीगीत प्रतिष्ठान नेपालका केन्द्रीय सचिव घनश्याम रिजालले शव ढकालकै भएको पुष्टी गरे । उनको मृत्यु के कति कारणले भयो भन्ने खुल्न सकेको छैन ।
इलाका प्रहरी कार्यालय गजुरीका इन्चार्ज डिएसपी मदनबहादुर कुँवरले शव भेटिएको स्थान निकै अप्ठेरो रहेको बताउँछन् । छिमेकी गोरखा जिल्लातिरबाट त्रिशूलीमा डुंगा चढेरमात्र आउन सकिने उनले बताए । ‘राति भएकोले शवको फोटोमात्र खिचिएको छ । यसअघि पनि तीन–चार जना हराएको सूचना छ। तर फोटोको आधारमा केहीले पुष्टी गरे पनि परिवार तथा आफन्तले सनाखत नगरेसम्म भन्न मिल्दैन,’ उनी भन्छन् ।
स्याङ्जाका गायक रिजालले रहस्यमय ढंगले ढकालको मृत्यु भएको भन्दै सत्यतथ्य छानबिनको माग गरेका छन् । ‘आफूलाई २ दिनअघि फोन गरेर पोखरा आउँदैछु, कोठा खोजिदिन भनेका प्रिय मान्छेको निधनले निकै दुखी छु,’ रिजालले भने । रिजालका अनुसार ढकाल निकै स्पष्टवक्ता तथा मिलनसार थिए ।
यसैबीच लालिगुरास मिडियाका कमल सरगमले फेसबुकमा एक स्टाटस राखेर “कृष्णभिर मुनि नदी किनार नजिक शंकास्पद रुपमा शव भेटिएको” उल्लेख गर्दै टाउको र शरिरमा समेत चोट रहेको शवको पक्कै प्रहरीले छानबिन गरि सत्यतथ्य बाहिर ल्याउने विश्वास गरेका छन्।
स्याङ्जाको चापाकोट नगरपालिका वडा ७, साखर घर भएका ढकाल केही समय दुवई पनि बसेका थिए । पछिल्लो समय हेर्ने कुरा डटकममा आबद्ध उनी नेपाली कांग्रेसनिकट थिए । केही म्यूजिक भिडियोमा उनले अभिनय गरेका छन्। सामाजिक सञ्जालमा ढकालको निधनप्रति हार्दिक श्रञ्द्धाजलीको बाढी छ।
नेपालि लोक संगीत क्षेत्रमा एकदमै नजिक रहेका ढकाल सबै कलाकारका प्रिय पात्र थिए । शव भेटिएको स्थान र सवको प्रकृति हेर्दा आत्महत्या नभई हत्या हुन सक्ने आंकलन प्रताक्षदर्शीहरुको रहेको भए पनि पोष्टमार्टम पश्चात् आधिकारिक धारणा आउने जनाइएको छ ।
