काठमाण्डु, १४ मंसिर– राष्ट्रिय स्वतन्त्र पार्टी (रास्वपा) सभापति रवि लामिछानेले आफ्नो पार्टीमा केही गलत प्रवृत्तिका मानिस रहेको बताएका छन् ।
महोत्तरीको जलेश्वरमा तीन दिनसम्म चलेको केन्द्रीय समिति र संसदीय दलको संयुक्त बैठकमा प्रस्तुत राजनीतिक प्रतिवेदनमा उनले पार्टीमा खराब प्रवृत्तिका मानिस पनि रहेको बताए । ती मानिसहरुका कारण पार्टीमा समस्या आउनसक्ने उनले लेखेका छन् ।
यद्यपि आफ्नो दलमा आबद्ध अधिकांश मानिस असल, निष्ठावान र इमान्दार रहेको दाबी गरे । लामिछानेले गलत प्रवृत्ति बोकेर आएकाहरुले पार्टी पङ्तिलाई दबाब र प्रभावमा पार्न सक्नेमा सचेत रहेको उल्लेख गरेका छन् । ती मानिसहरु अरु पार्टीबाट आएकाहरु रहेको लामिछानेको भनाइ छ ।
‘केही पूर्व पार्टीकै गलत प्रवृत्ति बोकेर आएको देखिन्छ । फरक राजनीतिक संस्कार र संस्कृतिको पक्षपाती हामीलाई तीमध्ये खराबहरूले क्रमशः दबाब र प्रभावमा पनि पार्न सक्ने देखिन्छ’, प्रतिवेदनमा उनले भनेका छन्, ‘नयाँ दलमा तत्काल सम्भावनाको अवसर पाइन्छ भन्ने लोभले आएकाहरूले हामीलाई बदनाम गराउने सम्भावना पनि बढी नै हुन्छ । यसतर्फ पनि हामी बेलैमा सचेत हुनुपर्छ ।’
त्यस्ता मानिसहरु अरु दलमा उचित स्थान नपाएर वा स्वार्थ पूरा हुने नदेखेर अवसरका लागि रास्वपा प्रवेश गेरको भन्दै उनले त्यस्ताहरुसँग सचेत रहन पार्टी पंक्तिलाई अपिल गरे ।
बेलैमा सचेत र सजग हुन नसके पुराना राजनीतिक दलमा विद्यमान गलत प्रवृत्ति रास्वपामा छिट्टै सर्ने भन्दै उनले पुरानो प्रवृत्तिसहित अघि बढ्दा सफल हुन नसकिने स्वीकार गरेका छन् । लामिछानेले जान्नेलाई छान्ने भन्नुको अर्थ माथि ल्याउने मात्र नभई मिल्काउनका लागि फिल्टर गर्ने पनि हो भन्नेमा आफू स्पष्ट रहेको बताए ।
लामिछानेले पार्टीमा राम्रा मान्छेलाई आउन रोक्ने प्रवृत्ति पनि रहेको र सो प्रवृत्तिले त्यस्तो कोसिस गरेको औंल्याए । लामिछानेले प्रतिवेदनमा पुराना पार्टीमा रहेका गलत प्रवृत्तिलाई निषेध गरिए पनि ती पार्टीभित्र निषेध गरिएका असल मानिसहरुलाई पार्टीमा ल्याउन उदार हुनुपर्ने विचार व्यक्त गरेका छन् ।