भरतपुर । प्रस्तावित रेलमार्ग पर्ने भरतपुर महानगरपालिकाको चारवटा वडाका स्थानीयले द्रुत विद्युतीय रेलमार्गको विकल्प खोज्न आग्रह गरेका छन् ।

घना बस्तीको बीचमा रेलमार्ग बनाउन लागिएको भन्दै भरतपुर–८, ७, ५ र ४ का स्थानीयले प्रस्तावित रेलमार्गको विकल्प खोज्न आग्रह गरेका हुन् । मेची–महाकाली द्रुत विद्युतीय रेलमार्गअन्तर्गत निजगढ–हेटौँडा–भरतपुर खण्डको डिजाइन अन्तिम चरणमा पुगेका बेला भरतपुरका स्थानीयले भने रेलमार्गको विषयमा असन्तुष्टि जनाएका हुन् ।

प्रस्तावित रेलमार्ग पर्ने वडाका स्थानीयले संघर्ष समिति नै बनाएका छन् । रेलमार्गको विकल्प खोज्नुपर्ने स्थानीयको मागमा सम्बन्धित वडाका जनप्रतिनिधिले पनि ऐक्यबद्धता जनाएका छन् । संघर्ष समितिले सोमबार जागरण अभियानको आयोजना गरेको थियो । उक्त कार्यक्रममा बोल्दै भरतपुर–८ का वडाध्यक्ष जीवनाथ कँडेलले घना बस्तीको बीचबाट कुनै हालतमा रेलमार्ग बनाउन नदिइने बताए । रेलमार्गको डिजाइन गर्ने बेलामा रेल विभागले स्थानीय सरकारसँग समन्वय नगरेको उनले बताए ।

‘समग्र वडावासीहरु एकजुट भएर लाग्नुस् । यो हाम्रो पीडा हो, हाम्रो छातीमाथि अपराध गरेको हो भनेर लाग्नुस्’, उनले भने, ‘हामीलाई विकासविरोधी भनिएको छ । हामी विकासविरोधी होइनौँ ।’ रेलमार्गका लागि लुकीछिपीरुपमा सर्वे गर्ने काम भएको भन्दै उनले रेलमार्ग बनाउने कामको प्रतिकार गर्न स्थानीय सरकार स्थानीयको साथमा हुने प्रतिबद्धता व्यक्त गरे । स्थानीय सरकारको सहमति र समन्वयबिना तयार गरिएको डिजाइनअनुसार रेलमार्ग बनाउन समन्वय गर्न पनि नसकिने उनले स्पष्ट पारे ।

प्रस्तावित रेलमार्ग पीडित संघर्ष समितिका सचिव दिव्यबाबु नेपालले रेलमार्गको विकल्प खोज्नुपर्ने विषयमा महानगर प्रमुख रेनु दाहाल र रेल विभागको ध्यानाकर्षण गराइसकिएको बताए । सौराहाबाट टिकौली जंगल हुँदै भरतपुर प्रवेश हुने रेलमार्ग भरतपुर–८ को भरतपुर रेडिमिक्सनजिकैबाट शरदपुर, गौरीगञ्ज, कृष्णपुर एकीकृत बस्ती हुँदै शिवघाट निस्किने उनले बताए । रेलमार्गले भरतपुरका मात्रै ८१५ घरधुरी प्रभावित हुने उनको भनाइ छ । ‘विकल्प हुँदाहुँदै घना बस्तीको बीचबाट रेलमार्ग लगिँदै छ’, उनले भने, ‘रेल विभागको महानिर्देशकलाई भेटेर रेलमार्ग बनाउन कर्मचारी नपठाउनू भनेको छु ।’

संघर्ष समिति र प्रस्तावित रेलमार्गका वडाध्यक्षहरुले केही दिनअघि महानगर प्रमुख दाहाललाई भेटेर रेलमार्गको विकल्प खोज्नका लागि पहल गर्न आग्रह गरेका थिए । चितवनको राप्ती नगरपालिकाका वडा नं–१, २, ३ र ६, खैरहनी नगरपालिका वडा नं–५, ७ र १०, रत्ननगर नगरपालिका वडा नं–४, ५ र ९ तथा भरतपुर महानगर वडा नं–४, ५, ७, ८ र १६ मा रेलमार्ग निर्माण गर्न प्रस्ताव गरिएको छ ।
-चितवनपोस्ट बाट