लागुऔषधका थुनुवालाई भगाएर आफू पनि फरार भएका तत्कालीन प्रहरी जवान १६ वर्षपछि पक्राउ परेका छन् ।
शुक्रबार बिहान काठमाडौं उपत्यका अपराध अनुसन्धान कार्यालयले पत्रकार सम्मेलन गरी थुनुवालाई भगाएर फरार भएका तत्कालीन प्रहरी जवान वीरबल राय यादवलाई सार्वजनिक गरेको हो ।
रौतहटको पथरावुधाम–३ का यादवले नक्कली चिट बनाएर आफैँले फिल्ड अधिकृतको कीर्ते दस्तखतसमेत गरी हिरासत कक्षबाट हत्कडीसहित बाहिर निकालेर फरार भएका थिए । यादवलाई १६ वर्षपछि काँकडभिट्टाबाट बिहीबार पक्राउ गरिएको प्रहरी नायब उपरीक्षक अनिल घिमिरेले जानकारी दिए ।
उनका अनुसार यादवलाई आवश्यक कारबाहीका लागि शुक्रबार बिहान प्रहरी परिसर काठमाडौंको जिम्मा लगाइएको छ । यादवलाई मुलुकी अपराध संहिता २०७४ को दफा १०२ अनुसार सजाय हुने डीएसपी घिमिरे बताए । तत्कालीन समयमा एक करोडबाट सुरु गरी १० लाखमा डिल गरेर यादवले थुनुवा भगाएबापत यादवले ६ लाख २५ हजार रुपैयाँ बुझेको प्रहरीले बताएको छ ।
पक्राउ पर्ने यादव हाल भारतको कोलकतामा श्रीमतीसहित बस्दै आएको खुलेको डीएसपी घिमिरेले बताए ।
