चितवन, चैत ३ : भरतपुर महानगरका उप्रमुख तथा कार्यबाहक नगर प्रमुख चित्रसेन अधिकारीले महानगरमा दैनिक ६ वटासम्म बेथिति र कालोबजारीको उजुरी पर्ने गरेको बताएका छन् ।
उजुरी दिने क्रम बढे पनि आफूहरु शुसाशन र अमनचयन मार्फत नागरिकलाई छिटोछरितो सेवा दिन प्रतिबद्ध रहेको उनले बताएका हुन् ।
शनिबार भरतपुरमा भएको चितवन मेटल इन्जिनियरिङ्ग एण्ड फेब्रिकेशन उद्योग समिति भरतपुरको पाचौ साधारणसभा तथा तेस्रो अधिवेशनमा बोल्दै अधिकारीले उजुरीको सम्बोधन गर्दै समस्याको समाधान गर्न महानगरपालिका २४ सै घण्टा तयार रहेको बताएका छन् । उनले स्थानीय सरकार जनताको घरदैलोको सरकार भएको विचार राखे ।
उपप्रमुख अधिकारीले भने, ‘यदि कसैलाई कुनै गुनासो वा उजुरी गर्नु परेमा निर्धक्क भएर राख्न आउन पनि सबै नागरिकहरुमा मेरो अनुरोध छ । पछिल्लो समय बेथिति र कालो बजारीका सवालमा महानगरपालिकामा दैनिक ५ देखि ६ वटा सम्म उजुरीहरु पर्ने गरेको बताउदै उनले हेलो सरकार मार्फत् पनि नागरिकले राखेका गुनासाहरुलाई महानगरपालिकाले समाधान गर्ने गरेको जानकारी दिए ।
स्थानीय सरकार सञ्चालन–ऐन २०७४ ले स्थानीय सरकारलाई जनताको घरदैलोको सरकार भनेर परिभाषित गरेको बताउदै उनले जनताका घाउमा मलम पट्टी लगाउन स्थानीय सरकार प्रतिबद्ध रहेको समेत दाबी गरे ।
कार्यवाहक उपप्रमुख अधिकारीले पछिल्लो समय देशमा रोजगारी सृजना नभई रहेको अवस्थामा चितवन मेटल इन्जिनियरिङ्ग एण्ड फेब्रिकेशनले केही हद सम्म भए पनि बेरोजगारी समस्या समाधान गर्ने गरि रोजगारी सृजना गरेकोमा खुसी समेत व्यक्त गरे । चितवन मेटल इन्जिनियरिङ एण्ड फेब्रिकेशन उद्योग समितिका अध्यक्ष ताराबहादुर कार्कीले स्वागत मन्तव्य सहित समितिले हालसम्म गरेका गतिविधिहरुको बारेमा वार्षिक प्रगति प्रतिवेदन प्रस्तुत गरेका छन् ।
कार्यक्रममा भरतपुर महानगरपालिका वडा नं. ११ का वडा अध्यक्ष कमल बहादुर मल्ल, चितवन उद्योग संघका अध्यक्ष सूर्यप्रसाद न्यौपाने, उद्योग वाणिज्य संघ चितवनका उपाध्यक्ष अशोक अधिकारी, ग्रिल व्यवसायी तथा स्टिल महासंघका उपाध्यक्ष एवम् बागमती प्रदेश संयोजक प्रकाश पौडेल, ग्रिल व्यवसायी तथा स्टिल महासंघ लुम्बिनी प्रदेशका अध्यक्ष अशोक बर्मा, ग्रिल तथा स्टिल व्यवसायी मकवापुरका अध्यक्ष केशव प्रसाई, पोखरा स्टिल फेब्रिकेशन एशोसिएनका अध्यक्ष वासुदेव पौडेल, रुपन्देही मल्टि इण्डष्ट्रिज प्रालिका मार्केटिङ प्रमुख दिपक चापागाइँलगायतले अधिवेशनमा शुभकामना व्यक्त गरेका छन् ।
